ڈی آئی جی آپریشنز کامران نے اپنے دفتر میں کھلی کچہری لگائی

لاہور(کرائم رپورٹر) ڈی آئی جی آپریشنز فیصل کامران نے اپنے دفتر میں طویل ترین کھلی کچہری لگائی۔ انہوں نے مسلسل 03 گھنٹے تک شہریوں کے مسائل سنے اور موقع پر متعلقہ افسران کو احکامات جاری کئے۔ دونوں بازوں سے محروم شہری بھی وراثتی جائیداد میں حصہ نہ ملنے پر کھلی کچہری پہنچ گیا۔ فیصل کامران نے متعلقہ افسران کو شہری کوحق دلوانے اور مکمل قانونی معاونت فراہم کرنے کی ہدایت کی۔ ہراسگی، دھمکیوں، گھریلو وراثتی تنازعات کی شکایات پربھی فوری احکامات جاری کئے گئے۔ بیٹوں کی ماں سے بدتمیزی اور دھمکیوں کی شکایات پر ایس ایچ اوز شاہدرہ اور اسلام پورہ کو تحفظ فراہم کرنے کی ہدایت کی گئی۔ فیصل کامران نے گروی مکان کے معاملے میں ڈیڑھ لاکھ روپے کی شکایت پر ایس ایچ او نشتر کالونی کو رقم واپسی دلوانے کی ہدایت کی۔ سود خور کی دھمکیوں کی شکایت پر ایس پی اقبال ٹائون کو قانونی کارروائی کا حکم دیا گیا۔ ڈی آئی جی آپریشنز نے پلاٹ کے عوض 20 لاکھ روپے بیانہ دینے کے باوجود قبضہ نہ ملنے کی شکایت پر ایس ایچ او باٹا پور کو دستاویزات کی جانچ پڑتال کے بعد کارروائی کا حکم دیا۔ تشدد اور دھمکیوں کی شکایت پر ایس ایچ او فیکٹری ایریا کو تصدیق کے بعد مقدمہ درج کرنے کا حکم دیا گیا۔ کاروباری لین دین اور کھانے کی رقم کے تنازع پر ایس ایچ او شاہدرہ کو قانون کے مطابق کارروائی کی ہدایت کی گئی۔ ڈی آئی جی آپریشنز فیصل کامران نے کہا کہ شہریوں کو تحفظ اور قانونی رہنمائی دینا پولیس کی بنیادی ذمہ داری ہے۔ ہراسگی اور سماجی جرائم کے خلاف زیرو ٹالرنس پالیسی جاری ہے۔ ہفتے میں 6 دن دفتر میں جبکہ اتوار کو فیس بک لائیو کے ذریعے کھلی کچہری کا انعقاد کیا جا رہا ہے۔