اقوام متحدہ کی جنرل اسمبلی میں بھارت ایک بارپھر شرمندہ، ٹرمپ نے نئی دہلی کے پروپیگنڈے کو بے نقاب کر دیا

نیویارک (این این آئی) امریکی صدر ڈونلڈ ٹرمپ نے اقوام متحدہ کی جنرل اسمبلی میں ایک بار پھر مئی 2025ء کی پاک بھارت کشیدگی کے حوالے  سے بھارت کے سرکاری بیانیے کی براہِ راست تردید کی۔ کشمیر میڈیا سروس کے مطابق صدر ڈونلڈ ٹرمپ نے 22 ستمبر 2026ء کو اقوام متحدہ کی جنرل اسمبلی کے 81ویں اجلاس سے خطاب کرتے ہوئے ایک بار پھر کہا کہ انہوں نے پاکستان اور بھارت کے درمیان تنازعہ ختم کرانے میں مدد کی اور اسے ان جنگوں میں شامل کیا جنہیں ان کی انتظامیہ نے ختم کرایا۔ ٹرمپ نے مزید آگے بڑھتے ہوئے عالمی رہنمائوں کو بتایا کہ پاکستان کے وزیراعظم شہبازشریف نے انہیں 3 کروڑ اور شاید اس سے بھی کہیں زیادہ جانیں بچانے کا کریڈٹ دیا، جبکہ شہبازشریف کو ایک شاندار شخص بھی قرار دیا۔ یہ بیان نئی دہلی کے لیے سیاسی طور پر باعثِ شرمندگی ہے کیونکہ بھارت مسلسل کسی بھی تیسرے فریق کی ثالثی کو مسترد کرتا آیا ہے اور اس کا موقف ہے کہ 10 مئی 2025ء کو جنگی کارروائیاں روکنے کا فیصلہ بھارتی اور پاکستانی عسکری قیادت کے درمیان براہِ راست طے پایا تھا۔ صدرٹرمپ نے باربار بھارتی موقف کی تردید کی اور دعویٰ کیا کہ امریکی مداخلت نے تصادم رکوانے میں مدد کی، جبکہ اس سے قبل وہ اپنی مداخلت کو تجارت اور ٹیرف کے دبائو سے بھی جوڑ چکے ہیں۔