لاہور (آئی این پی)کر کٹر محمد رضوان پر عائد الزامات سے نمٹنے کے طریقہ کار پر سابق کرکٹرز نے سخت تنقید کی ہے۔ ٹھوس شواہد کی عدم موجودگی اور سابق پاکستانی کپتان کے خلاف باضابطہ تحریری چارج نہ ہونے پر سوالات اٹھائے ہیں۔ راولپنڈی ایکسپریس شعیب اختر کا کہنا تھا ٹھوس شواہد کے بغیر رضوان کو ہدف بنانا قربانی کا بکرا بنانے کے مترادف ہے۔ سابق ٹیسٹ کرکٹر محسن خان نے کہا کہ فکسنگ اور جوئے کے غیر ثابت شدہ الزامات کھلاڑی کی ساکھ کو نقصان پہنچاتے ہیں۔
جنید خان نے بھی اظہار تشویش کیا اور کہا کہ رضوان کو اب تک کوئی تحریری الزام یا باضابطہ فرد جرم نہیں دی گئی، اس انکوائری کے باعث رضوان کو اپنی طے شدہ عمرہ ادائیگی کا سفر منسوخ کرنا پڑا۔
یہ تنقید ایسے وقت میں سامنے آئی ہے جب اب تک رضوان کی جانب سے کسی مخصوص قانونی یا معاہداتی خلاف ورزی کی عوامی طور پر نشاندہی نہیں کی گئی۔ اس نمائندے نے موقف جاننے کے لیے تمام متعلقہ محکموں سے رابطہ کیا، تاہم کسی نے جواب نہیں دیا۔
