لاہور(جنرل رپورٹر)پنجاب پبلک سروس کمیشن نے حکومت پنجاب کے مختلف محکموں کے تحریرینتائج اور حتمی نتائج کا اعلان کر دیا ہے۔ ان نتائج میں محکمہ بورڈ آف ریونیو، پنجاب فوڈ اتھارٹی، محکمہ جیل خانہ جات، پنجاب ڈیزاسٹر مینجمنٹ اتھارٹی اور لوکل گورنمنٹ اینڈ کمیونٹی ڈویلپمنٹ ڈیپارٹمنٹ شامل ہیں۔ سیکرٹری پنجاب پبلک سروس کمیشن افضال احمد نے نتائج جاری کر دیے ہیں۔ترجمان پنجاب پبلک سروس کمیشن کے مطابق: ڈپٹی کمشنر کوٹ ادو، بورڈ آف ریونیو میں سٹینوگرافر کی 2 اسامیوں کے لیے انگریزی شارٹ ہینڈ ٹیسٹ میں کوئی امیدوار کامیاب نہیں ہوا۔ ایڈیشنل ڈپٹی کمشنر ریونیو، کوٹ ادو، بورڈ آف ریونیو میں سٹینوگرافر کی ایک آسامی کے لیے بھی انگریزی شارٹ ہینڈ ٹیسٹ میں کوئی امیدوار کامیاب نہیں ہوا۔ پنجاب فوڈ اتھارٹی، پرائس کنٹرول اینڈ کموڈیٹیز مینجمنٹ ڈیپارٹمنٹ میں پبلک ریلیشنز آفیسر کی ایک آسامی کے لیے تحریری اور پروفیشنسی ٹیسٹ کے نتیجے میں 5 امیدوار انٹرویو کے لیے عارضی طور پر کامیاب قرار پائے ہیں۔ پنجاب جیل خانہ جات ڈیپارٹمنٹ میں خواتین کے لیے جونیئر کمپیوٹر آپریٹر کی 6 اسامیوں کے لیے 121 امیدوار تحریری امتحان کے بعد انگلش ٹائپنگ ٹیسٹ اور کے لیے کامیاب قرار پائے ہیں۔ ڈیزاسٹر مینجمنٹ ڈیپارٹمنٹ/پی ڈی ایم اے میں جونیئر کمپیوٹر آپریٹر کی ایک آسامی کے لیے 20 امیدوار تحریری امتحان کے بعد ٹائپنگ اور پروفیشنسی ٹیسٹ کے لیے کامیاب قرار پائے ہیں۔ پنجاب پبلک سروس کمیشن نے لوکل گورنمنٹ اینڈ کمیونٹی ڈویلپمنٹ ڈیپارٹمنٹ میں چیف آفیسر / میونسپل آفیسر (ریگولیشنز) کی 20 اسامیوں کے حتمی نتائج کا بھی اعلان کیا ہے۔ ان اسامیوں پر 19 امیدوار حتمی طور پر کامیاب ہوئے ہیں جبکہ ایک آسامی موزوں امیدوار کی عدم دستیابی کے باعث اقلیتی کوٹے میں خالی رہ گئی ہے۔تحریری امتحانات میں کامیاب قرار پانے والے امیدواروں کو اگلے مراحل کے لیے کال لیٹرز پنجاب پبلک سروس کمیشن کی ویب سائٹ پر مقررہ شیڈول کے مطابق اپ لوڈ کیے جائیں گے، جبکہ امیدواروں کو SMS اور ای میل کے ذریعے بھی آگاہ کیا جائے گا۔ امیدواروں کے لیے ضروری ہے کہ وہ انٹرویو یا متعلقہ ٹیسٹ کے وقت اصل تعلیمی اسناد اور دیگر متعلقہ دستاویزات ہمراہ لائیں۔ کامیاب امیدواروں کی فہرستیں اور متعلقہ رزلٹ انٹیمیشن بھی پنجاب پبلک سروس کمیشن کی ویب سائٹ پر دستیاب ہوں گی۔
