کفایت شعاری مہم پنجاب کے ترقیاتی منصوبوں کیلئے گرانٹ میں 20 فیصد کمی

ملتان (سٹی رپورٹر) کفایت شعاری مہم کے تحت پنجاب بھر میں ترقیاتی منصوبوں کی گرانٹ میں 20 فیصد کمی کر دی گئی ہے۔ ڈویلپمنٹ اتھارٹیز اور تمام میونسپل کارپوریشنز کو اپنے فنڈز سے ترقیاتی سکیمیں جاری کرنے کی ہدایت کردی گئی ہے۔  ذرائع کے مطابق حکومت پنجاب نے صوبائی محکموں کو کفایت شعاری مہم پر سختی سے عمل درآمد کرنے کی ہدایت کی ہے، اس ضمن میں ترقیاتی منصوبوں کو دی جانے والی گرانٹ میں 20 فیصد کمی کردی گئی ہے۔ واسا پنجاب کے مختلف اضلاع میں جاری 100 ارب کے منصوبوں میں بھی کٹوتی کی گئی ہے ، علاوہ ازیں حکومت پنجاب نے صوبے کی بڑی ڈویلپمنٹ اتھارٹیز جن میں ایل ڈی اے لاہور ،ایم ڈی اے ملتان، فیصل آباد ڈویلپمنٹ اتھارٹی ،راولپنڈی ڈویلپمنٹ اتھارٹی سمیت دیگر کو اپنے سیلف انکم سے ترقیاتی سکیموں کو شروع کرنے کی ہدایت کی گئی ہے۔ پنجاب حکومت کی ہدایت پر عید گاہ سے چوک کمہاراں تک کشادگی کے لئے 10 ارب کے فنڈز مختص کردیئے گئے ہیں ،اسی طرح میونسپل کارپوریشن ملتان کی جانب سے برینڈ روڈ پر پارکنگ پلازہ کی تعمیر کے لئے میونسپل کارپوریشن ملتان نے دس کروڑ روپے ذاتی فنڈز سے جاری کیے ہیں ۔ پنجاب بھر سے صوبائی ترقیاتی محکموں کو سلیف انکم سے ترقیاتی سکیموں کو فوری شروع کرنے کی ہدایت کی گئی ہے۔
کٹوتی