لیسکو کے 33 ہزار خراب بجلی کے میٹرز تاحال تبدیل نہ ہو سکے

لاہور (این این آئی)مون سون سیزن کے دوران جلنے اور خراب ہونے والے بجلی کے میٹرز کو تبدیل نہ کیا جا سکا جس سے صارفین کو مشکلات کا سامنا کرنا پڑ رہا ہے جبکہ سنگل اور تھری فیز میٹرز تبدیل نہ ہونے کے باعث بھاری اوسط بلز بھی جاری کر دیئے گئے۔ذرائع کے مطابق لیسکو میں 32ہزار سنگل فیز میٹرز کو ڈیفیکٹو کوڈ لگایا گیا جبکہ ایک ہزار تھری فیز میٹرز کو بھی ڈیفیکٹو قرار دیا گیا۔ذرائع کا کہنا ہے کہ مجموعی طور پر 33ہزار سنگل اور تھری فیز میٹرز کو ڈیفیکٹو کوڈ لگا کر صارفین کو اوسط بل جاری کیے گئے، جس سے صارفین کو واجبات کی مد میں بھاری ادائیگیاں کرنا پڑیں۔نیپرا رولز کے مطابق خراب بجلی کے میٹرز کو تبدیل کرنا لیسکو کی ذمہ داری ہے تاہم متاثرہ میٹرز تاحال تبدیل نہیں کیے جا سکے۔