برطانوی اخبار کی رپورٹ؛ طاہر اشرفی اور ان کے بھائی کیخلاف شفاف تحقیقات کا مطالبہ

لاہور(مانیٹرنگ ڈیسک) لاہور میں سول سوسائٹی نیٹ ورک پاکستان نے برطانوی اخبار دی ٹیلی گراف میں حافظ طاہر محمود  اشرفی اور ان کے بھائی حسن معاویہ اشرفی سے متعلق شائع ہونے والی رپورٹ کے تناظر میں وزیراعظم شہباز شریف سے معاملے کی شفاف اور غیر جانب دارانہ تحقیقات کروانے کا مطالبہ کردیا۔سول سوسائٹی نیٹ ورک کے صدر عبداللہ ملک ایڈووکیٹ کی جانب سے وزیراعظم کو ارسال کیے گئے خط میں کہا گیا ہے کہ 24 ستمبر 2026 کو دی ٹیلی گراف میں شائع ہونے والی تحقیقاتی رپورٹ میں توہین مذہب کے قوانین کے مبینہ غلط استعمال، بلیک میلنگ، اغوا، تشدد اور سوشل میڈیا کے ذریعے مبینہ ہنی ٹریپ سمیت مختلف الزامات کا ذکر کیا گیا ہے۔خط میں کہا گیا ہے کہ اخبار نے پولیس چالانوں اور دیگر ریکارڈ کا جائزہ لینے کا دعوی کرتے ہوئے حسن معاویہ اشرفی کی جانب سے متعدد افراد کے خلاف توہین مذہب سے متعلق شکایات درج کرانے اور بعض افراد کے اہل خانہ کی جانب سے اغوا، تشدد اور رقم طلب کیے جانے کے الزامات رپورٹ کیے ہیں۔عبداللہ ملک نے کہا کہ مذکورہ الزامات کو تحقیقات اور قانونی کارروائی مکمل ہونے تک ثابت شدہ حقائق قرار نہیں دیا جا سکتا، حسن معاویہ اشرفی کی جانب سے الزامات کی تردید اور پاکستان علما کونسل کی جانب سے دی ٹیلی گراف کی رپورٹ کو مسترد کیے جانے کے مقف کو بھی تحقیقات میں شامل کرنا چاہیے۔