ڈی آئی جی ٹریفک پنجاب کی بغیر ڈرائیونگ لائسنس گاڑیاں چلانے والوں کیخلاف کارروائی کی ہدایت

لاہور (کرائم رپورٹر) ڈی آئی جی ٹریفک پنجاب محمد وقاص نذیر نے صوبہ بھر میں بغیر ڈرائیونگ لائسنس گاڑیاں چلانے والوں کے خلاف سخت کارروائیوں کی ہدایت کر دی۔ انہوں نے تمام چیف ٹریفک آفیسرز (سی ٹی اوز) اور ڈسٹرکٹ ٹریفک آفیسرز (ڈی ٹی اوز) کو ہدایت کی ہے کہ بغیر لائسنس ڈرائیونگ کرنے والوں کے خلاف بلاامتیاز کارروائی عمل میں لائی جائے اور تمام اضلاع میں لائسنس چیکنگ مہم مزید سخت کی جائے۔ ترجمان کے مطابق رواں سال پنجاب بھر میں بغیر لائسنس گاڑی چلانے والے 8 لاکھ 30 ہزار سے زائد ڈرائیورز کے چالان کیے گئے جبکہ لاہور ٹریفک پولیس نے ایک لاکھ 47 ہزار سے زائد ایسے ڈرائیورز کے خلاف کارروائی کی۔ ڈی آئی جی ٹریفک پنجاب محمد وقاص نذیر نے کہا کہ بغیر ڈرائیونگ لائسنس گاڑی چلانا جرم ہے اور اس کے خلاف مزید سخت اقدامات کیے جائیں گے۔ ٹریفک حادثات کی روک تھام اور شہریوں کی جان و مال کے تحفظ کے لیے بغیر لائسنس ڈرائیونگ کرنے والوں کے خلاف کارروائی ناگزیر ہے۔ انہوں نے شہریوں پر زور دیا کہ جرمانوں اور قانونی کارروائی سے بچنے کے لیے فوری طور پر اپنا ڈرائیونگ لائسنس بنوائیں۔ لائسنس کے حصول کے لیے آن لائن پورٹل، خدمت مراکز اور لائسنس سینٹرز سے استفادہ کیا جا سکتا ہے۔ محمد وقاص نذیر کا کہنا تھا کہ ٹریفک قوانین کی پابندی اور ذمہ دارانہ ڈرائیونگ سے ہی سڑکوں پر محفوظ سفر کو یقینی بنایا جاسکتا ہے۔ تمام متعلقہ افسران کو ہدایت کی گئی ہے کہ قانون پر عملدرآمد کے لیے موثر اقدامات جاری رکھیں۔