پورٹ آف سپین(اے پی پی)کیریبین پریمیئر لیگ میں آندرے رسل کی شاندار ہیٹرک اور طوفانی سنچری کی بدولت جمیکا تلاواز نے ٹرنبیگو نائٹ رائیڈرز کو 4 وکٹوں سے شکست دے کر فاتحانہ آغاز کیا، فاتح ٹیم نے 224 رنز کا ہدف آخری اوور کی تیسری گیند پر 6 وکٹوں کے نقصان پر پورا کیا، 41 کے سکور پر ابتدائی 5 وکٹیں گرنے کے بعد رسل ڈٹ گئے، انہوں نے جارحانہ انداز اپناتے ہوئے حریف باﺅلرز کا بھرکس نکال دیا، انہوں نے 40 گیندوں پر سنچری بنا کر سی پی ایل تاریخ کی تیز تری سنچری بنانے کا اعزاز اپنے نام کیا، انہوں نے 49 گیندوں پر 13 چھکوں اور 6 چوکوں کی مدد سے 121 رنز کی ناقابل شکست اننگز کھیل کر حریف ٹیم کی جیت کی امیدوں پر پانی پھیر دیا اور میچ کے بہترین کھلاڑی قرار پائے۔ سی پی ایل کے سلسلے میں کھیلے گئے تیسرے میچ میں ٹرنبیگو نائٹ رائیڈرز نے پہلے کھیلتے ہوئے مقررہ اوورز میں 6 وکٹوں کے نقصان پر 223 رنز بنائے، کولن منرو 61، برینڈن میک کولم 56 کرس لین 46 ڈیرن براوو 29 رنز بنا کر آﺅٹ ہوئے، رسل نے شاندار ہیٹرک کی، عماد وسیم نے ایک وکٹ لی، جواب میں جمیکا تلاواز نے مطلوبہ ہدف 19.3 اوورز میں 6 وکٹوں پر حاصل کیا، تلاواز کی اننگز کا آغاز انتہائی مایوس کن تھا اور 41 کے سکور پر اس کے 5 مستند کھلاڑی آﺅٹ ہو کر پویلین لوٹ گئے، اس موقع پر آندرے رسل نے میدان سنبھالا، انہوں نے جارحانہ انداز اپناتے ہوئے حریف باﺅلرز کی خوب دھنائی کی اور شاندار سنچری سکور کی، انہوں نے 49 گیندوں پر 13 چھکوں اور 6 چوکوں کی مدد سے 121 رنز کی اننگز کھیل کر ٹیم کو فتح دلائی، علی خان نے 3 اور فواد احمد نے 2 وکٹیں لیں۔
