لاہور(مانیٹرنگ ڈیسک) پیپلز پارٹی کے رہنمائ اخونزادہ چٹان نے کہا کہ حکومت قدم قدم پر ثابت کر رہی ہے یہ سلیکٹڈ حکومت ہے بلاول نے کبھی پیشی پر ورکرز کو کال نہیں دی ورکرز خود ہی آ جاتے ہیں لیکن مخالفین باتیں کرتے ہیں۔ چینل فائیو کے پروگرام ”نیوز ایٹ سیون“میں گفتگو کرتے ہوئے انہوں نے کہا کہ ہمارے لوگ نیب کے دفتر تک نہیں جاتے ڈی چوک پر ناکے پر رک جاتے ہیں لیکن پھر بھی تشدد کیا جاتا ہے۔ہمارے کارکن بالکل پرامن احتجاج کرتے ہیں کسی کو گالی نہیں دیتے۔جو لوگ امپائر کی انگلی پر سیاست نہیں کرتے ان پر نیب کیسز بنا دیتے جاتے ہیں۔تحریک انصا ف کے لوگ اسمبلی میں نہیں آتے وزیراعظم عمران خان بھی نہیں آتے۔عید کے بعد مزید مہنگائی ہو گی پٹرول مہنگا ہو گا جس کے بعد عوام کو باہر نکلنا ہی پڑے گا حکومت عوامی سیلاب کو نہیں روک سکے گی۔قانون دان عارف چوہدری نے کہا کہ چیئرمین نیب کسی کے خلاف بغیر ثبوت کے کارروائی نہیں کرتے۔زرداری اور بلاول کہتے ہیں ہم نے عدالتوں کا سامنا کیا یہ ان کا سیاسی بیانیہ ہے ہر سیاسی پارٹی اپنا کوئی نہ کوئی موقف تو پیش کرتی ہی ہے ورنہ لوگوں کی نظر میں حیثیت ختم ہو جاتی ہے۔میں سمجھتا ہوں آصف زرداری کے پاس بڑی قانونی ٹیم ہے۔زرداری کا معاملہ تو سیدھا کرپشن کا ہے آخریہ اتنے امیر کیسے ہو گئے اتنا پیسہ کہاں سے آیا اس کا جواب تو دینا پڑے گا۔نیب پراسیکیوٹرز کی وابستگیاں کہاں کہاں ہیں وہ سب کو معلوم ہے نیب اور کرپٹ عناصر اکٹھے نہیں چل سکتے اس جانب توجہ دینی چاہئے۔
