حج کے انعقاد سے متعلق حتمی فیصلہ رمضان المبارک میں ہوگا، وفاقی وزیر مذہبی امور

اسلام آباد(ویب ڈیسک) وفاقی وزیر مذہبی امور نورالحق قادری نے کہا ہے کہ 15 رمضان المبارک تک حج ہونے یا نہ ہونے کا فیصلہ ہو جائے گا۔ ذرائع کے مطابق وزیر مذہبی امور کے جاری کردہ بیان میں کہا گیا ہے کہ سعودی حکومت حج سے متعلق پاکستان سے مشاورت کرکے حتمی فیصلہ کرے گی۔ سعودی وزارت حج نے فی الوقت کوئی بھی معاہدہ کرنے سے روک رکھا ہے۔ ان کے حکام سے مسلسل رابطے میں ہیں۔ ان کا کہنا تھا کہ سعودی حکومت کورونا وائرس کے پھیلاو کا مکمل طور پر جائزہ لے رہی ہے اورحج ادائیگی سے متعلق مختلف تجاویز ان کے زیر غور ہیں۔ جن میں پہلا آپشن یہ ہے کہ صرف سعودی عرب کے مقامی افراد کو حج کی اجازت دی جائے اس کے علاوہ تمام ممالک کے کوٹے کو صرف دس فیصد تک لے جانے اور صرف خلیجی ممالک کے حجاج کو حج کی اجازت دینے کی تجاویز بھی زیر غور ہیں۔