لاہور: (ویب ڈیسک ) ایپکس کمیٹی پنجاب نے کہا ہے کہ کورونا ایس او پیز پر عملدرآمد کیلئے حکومتی اقدامات پر من وعن عملدرآمد کرایا جائے گا۔
تفصیل کے مطابق وزیراعلیٰ پنجاب عثمان بزدار کے زیر صدارت ایپکس کمیٹی کا اجلاس ہوا جس میں کور کمانڈر لاہور لیفٹیننٹ جنرل ماجد احسان، ڈی جی رینجرز پنجاب، صوبائی وزرا اور آئی جی پنجاب سمیت اعلیٰ افسروں نے بھی شرکت کی۔
ایپکس کمیٹی نے کورونا ایس او پیز پر عملدرآمد نہ کیے جانے پر تشویش کا اظہار کرتے ہوئے عوام کی زندگیوں کو محفوظ بنانے کیلئے بھرپور کاوشوں کا عزم کیا۔
اجلاس کے دوران ایس او پیز پر عملدرآمد کیلئے مربوط انداز میں موثر اقدامات اٹھانے پر اتفاق جبکہ کورونا ایس او پیز کی خلاف ورزی پر قانون کے مطابق کارروائی کا فیصلہ کیا گیا۔ اس کے علاوہ مارکیٹوں، بازاروں اور عوامی مقامات پر ایس او پیز کی خلاف ورزی پر جرمانہ کی تجویز بھی دی گئی۔
کور کمانڈر لاہور لیفٹیننٹ جنرل ماجد احسان نے کورونا سے نمٹنے کیلئے حکومت کیساتھ تعاون جاری رکھنے کے عزم کا اظہار کیا۔ اجلاس میں فیصلہ کیا گیا کہ معاشی سرگرمیوں کو بند کئے بغیر ایس او پیز کی پابندی کو یقینی بنایا جائے گا۔
اس کے علاوہ سمارٹ اور مائیکرو لاک ڈاؤن والے علاقوں میں آمدورفت کو محدود کرنے کا فیصلہ کرتے ہوئے کہا گیا کہ کورونا ایس او پیز پر عملدرآمد کیلئے حکومتی اقدامات پر من وعن عملدرآمد کرایا جائے گا۔
کور کمانڈ لاہور کا کہنا تھا کہ کورونا وائرس کی دوسری لہر پر قابو پانے کیلئے مشترکہ کاوشوں کو مزید موثر بنائیں گے۔ عوام کی زندگیوں کا تحفظ سب سے زیادہ عزیز ہے۔ کورونا کی دوسری لہر پر قابو پانا قومی چیلنج ہے۔ انسانی زندگیوں کے تحفظ کیلئے سول حکومت کے شانہ بشانہ کھڑے ہیں۔
اس موقع پر اجلاس سے خطاب کرتے ہوئے وزیراعلیٰ پنجاب کا کہنا تھا کہ کورونا وائرس کی دوسری لہر میں تشویشناک حد تک اضافہ ہو چکا ہے۔ کورونا کی اس لہر کو احتیاطی تدابیر اور ایس او پیز پر عمل کرکے پسپا کرنا چاہتے ہیں۔
سردار عثمان بزدار نے کہا کہ مزدور طبقے کے معاشی مسائل کو مدنظر رکھتے ہوئے ضروری پابندیاں لگائی گئی ہیں۔ ہسپتالوں میں کورونا مریضوں کے علاج کیلئے ممکنہ سہولتیں فراہم کرنے پر توجہ دے رہے ہیں۔ کورونا وبا کا پھیلاؤ روکنے کیلئے عوام کا تعاون بے حد ضروری ہے۔
ان کا کہنا تھا کہ ٹیچنگ ہسپتالوں میں ایچ ڈی یوز اور ایکسپو سینٹر میں فیلڈ ہسپتال کو بھی ازسرنو فعال کیا ہے۔ محکمہ صحت کو ترجیحی بنیادوں پر فنڈز فراہم کئے ہیں۔ ایپکس کمیٹی کے فیصلوں پر ہر صورت عملدرآمد کرائیں گے۔
وزیراعلیٰ عثمان بزدار اور ایپکس کمیٹی کے شرکا نے کور کمانڈر لاہور لیفٹیننٹ جنرل ماجد احسان کی پیشہ ورانہ خدمات کو خراج تحسین کرتے ہوئے کہا کہ انہوں نے کورونا وبا اور دیگر چیلنجز کے دوران بھرپور تعاون کیا جس پر ہم ان کے شکر گزار ہیں، ہم ان کیلئے نیک خواہشات کا اظہار کرتے ہیں۔
سیکرٹری پرائمری و سکینڈری ہیلتھ نے اجلاس کے شرکا کو کورونا کی دوسری لہر کا پھیلاؤ روکنے کے لئے اقدامات کے بارے میں بریفنگ دی اور کہا کہ پنجاب میں کورونا کی موجودہ صورتحال جون 2020ء کی سطح پر پہنچ گئی ہے۔ پنجاب حکومت نے ہسپتالوں میں آکسیجن کے بیڈز، وینٹی لیٹرز اور دیگر ضروری سہولتوں میں اضافہ کیا ہے۔
