قومی اسمبلی میں اپوزیشن لیڈر شہباز شریف نے بجٹ 22-2021 میں حکومتی اعداد و شمار جعلی قرار دے دیے۔
اسمبلی اجلاس کے دوران اپوزیشن لیڈرشہباز شریف نے بجٹ پر بحث کا آغاز کرتے ہوئے کہا کہ بجٹ میں جس ترقی اور خوش حالی کا ڈھنڈورا پیٹا گیا وہ بنی گالہ اور ان کے حواریوں کی ترقی ہے ،کروڑوں غریب عوام کو کوئی سہارا نہیں دیا گیا۔
شہباز شریف کا کہنا تھا کہ ان کے تمام اعداد وشمار جعلی ہیں،ریاست مدینہ کی مثال دینے والے کاش یتیم و بیوہ مظلوم کا ہاتھ تھام لیتے، اگر ترقی آئی ہے تو وہ بنی گالا کے محلات اور امیروں کی ترقی ہے،غریبوں کو ایک وقت کی روٹی نصیب نہیں۔
اپوزیشن لیڈر کا کہنا تھا کہ بجٹ میں اکنامک گروتھ کا ڈھنڈورا پیٹا جارہا ہے۔
شہباز شریف کی بجٹ تقریر کے دوران حکومتی اراکین نے شور شرابا کیا جس پر اسپیکر قومی اسمبلی کا کہنا تھا کہ آپ ایک دوسرےکو سنیں، میں اجلاس 20 منٹ کے لیے ملتوی کرتا ہوں۔
