وزیراعظم کا ایرانی صدر کو ٹیلیفون،عید کی مبارکباد اور باہمی تعلقات پر گفتگو

اسلام آباد: (ویب ڈیسک) وزیراعظم شہباز شریف نے ایران کے صدر سید ابراہیم رئیسی سے ٹیلیفونک رابطہ کیا۔ اپنی خوشگوار گفتگو کے دوران دونوں رہنماؤں نے عید کی مبارکباد کا تبادلہ کیا اور دو طرفہ تعلقات پر تبادلہ خیال کیا۔
وزیراعظم شہباز شریف نے پاک ایران جغرافیائی قربت، مشترکہ تاریخ اور باہمی افہام و تفہیم کے حوالے سے تاریخی تعلقات کی اہمیت اجاگر کی۔ انہوں نے تجارت، توانائی، بجلی اور دونوں ممالک کے آپس کے روابط سمیت باہمی تعاون کے تمام شعبوں میں دوطرفہ تعلقات کو فروغ دینے کے لیے اپنی حکومت کے مضبوط عزم کا اعادہ کیا۔
وزیراعظم نے مزید کہا کہ مشترکہ اقتصادی کمیشن (جے ای سی) کے اجلاس کے جلد منعقد ہونے سے دونوں ممالک کے درمیان اقتصادی روابط مزید مضبوط ہوں گے۔ وزیراعظم نے اس امید کا بھی اظہار کیا کہ سرحدی علاقے میں بارڈر سسٹینینس مارکیٹس جلد فعال ہو جائیں گی۔
شہباز شریف نے صوبہ بلوچستان میں جنگلات میں لگی آگ بجھانے میں مدد کے لیے بروقت مدد اور طیارے پاکستان کو دینے پر ایرانی قیادت کا شکریہ ادا کیا۔ ہر سال زائرین کے دورے میں سہولت فراہم کرنے کے لیے ایران کے تعاون کو سراہتے ہوئے وزیراعظم نے عوام سے عوام کے تبادلوں کو مزید بڑھانے کی اہمیت پر زور دیا۔
وزیر اعظم شہباز شریف نے جموں و کشمیر کے تنازع پر ایران کی جانب سے خاص طور پر ایران کے سپریم لیڈر کی مستقل حمایت کو سراہا۔ صدر رئیسی نے عید کی مبارکباد پر وزیراعظم کا شکریہ ادا کیا اور دوطرفہ تجارت کو مزید تیز کرنے باالخصوص مکران ڈویژن کو بجلی کی فراہمی میں ایرانی تعاون کی یقین دہانی کرائی۔
اعلیٰ سطح کے تبادلوں کی اہمیت پر زور دیتے ہوئے وزیر اعظم نے ایرانی صدر کو پاکستان کے دورے کی پرزور دعوت دی۔ صدر رئیسی نے بھی وزیراعظم کو جلد از جلد ایران کا سرکاری دورہ کرنے کی دعوت دی۔