سمت درست ہے، اپوزیشن کے کہنے سے ملک ڈیفالٹ نہیں کرے گا: اسحاق ڈار

اسلام آباد: (ویب ڈیسک) وفاقی وزیر خزانہ اسحاق ڈار نے کہا ہے کہ سمت درست ہے، اپوزیشن کے کہنے سے پاکستان ڈیفالٹ نہیں کرے گا۔
اپٹما کی جانب سے اپنے اعزاز میں دیئے گئے ظہرانے سے خطاب کرتے ہوئے وزیر خزانہ نے کہا کہ اپوزیشن دنیا کو فرضی کرپشن کے قصے سنا کر پاکستان میں سرمایہ کاری کے رستے بند کر رہی ہے۔
وزیر خزانہ اسحاق ڈار نے کہا کہ اپوزیشن کے غیر سنجیدہ بیانات سے پاکستان کی ساکھ کو بے حد نقصان پہنچ رہا ہے، امیر افراد قرضے معاف کروا لیتے ہیں، غریب بیوہ خواتین کے چند ہزار کی عدم ادائیگی پر اثاثے منجند ہو جاتے ہیں۔
وزیر خزانہ اسحاق ڈار نے مزید کہا کہ مالی انتظام بہتر کرنے کی پاداش میں 5 سال جلا وطنی گزاری، میرے ساتھ دہشت گردوں جیسا سلوک کیا گیا۔
انہوں نے کہا کہ جس رفتار سے ہم پہلے چل رہے تھے، ہمیں جی 20 کا حصہ ہونا چاہیے تھا، آج ہماری معیشت 46 ویں نمبر پر جا پہنچی ہے، ملک سے گندم کی سمگلنگ کو جنگی بنیادوں پر روکنا ہو گا۔
اسحاق دار کا مزید کہنا تھا کہ ہم نے محنت کی 5 دن میں بجٹ دیا اور ملک کو ڈیفالٹ سے بچایا، ہم نے 2013 سے 16 تک اپنا پروگرام مکمل کیا جو ملک کی تاریخ میں ایک بار ہی ہوا ہے۔