الیکشن کمشنر کا لگایا ہوا وزیراعلیٰ نہیں چلنے دیں گے : پرویز الہٰی

لاہور: (ویب ڈیسک) وزیراعلیٰ پنجاب چودھری پرویز الہٰی نے کہا ہے کہ چیف الیکشن کمیشنر کے لگائے گئے وزیراعلیٰ کو نہیں چلنے دیں گے، الیکشن کمشنر کے وزیراعلیٰ کے خلاف عدالت جائیں گے۔
وزیراعلیٰ پنجاب چودھری پرویز الٰہی نے ارفع کریم سافٹ ویئر ٹیکنالوجی پارک میں حرمت قرآن کریم پورٹل کا افتتاح کر دیا، اس موقع پر انہوں قرآن بورڈ میں انفارمیشن ٹیکنالوجی کا خصوصی سیل بنانے کی بھی ہدایت کی۔
انہوں نے کہا کہ کہا کہ حرمت قرآن کریم پورٹل آرٹیفیشل انٹیلی جنس پر مبنی ٹیکنالوجی کے تحت کام کرے گا، پورٹل ویب سائٹس پر موجود قرآن کریم سے متعلق جعلی مواد کی نشاندہی کرے گا، حرمت قرآنِ کریم پورٹل قرآن بورڈ اور متعلقہ اداروں کو ویب سائٹس پر قرآن سے متعلق منفی مواد کے بارے میں الرٹ جاری کرے گا، قرآن پورٹل متعلقہ اداروں کو متنازعہ مواد بلاک کرنے اور ایسا مواد اپ لوڈ کرنے والوں کے خلاف کارروائی کیلئے بھی الرٹ جاری کرے گا۔
وزیراعلیٰ نے بتایا کہ حرمت قرآن کریم پورٹل کے ذریعے مذموم حرکتیں کرنے والوں کی ویب سائٹس کو بلاک کیا جاسکے گا، سسٹم کی مدد سے پبلشرز اور ای پبلشرز کی رجسٹریشن اور مانیٹرنگ بھی کی جا سکے گی، قرآن پورٹل بنانے میں دو ماہ کا وقت لگے گا، یہ ٹیکنالوجی سعودی عرب سمیت دیگر اسلامی ممالک کو بھی دیں گے۔
ان کا کہنا تھا کہ الیکشن کمیشن روز عمران خان کے خلاف کیسز بنا رہا ہے، الیکشن کمیشن کی نیت کو جانتے ہیں، چیف الیکشن کمشنر کا لگایا ہوا وزیراعلیٰ نہیں چلنے دیں گے، الیکشن کمشنر کے چیف منسٹر کے خلاف عدالت جائیں گے، عمران خان غلطی کریں تو ہم انہیں روکتے ہیں، دشمن غلطی کرے تو اسے نہیں روکنا چاہیے۔