خیبرپختونخوا کو مالی بحران سے نکالنے کیلئے لکڑیاں بیچنے پر غور

پشاور : (ویب ڈیسک) خیبرپختونخوا کو مالی بحران سے نکالنے کے لئے اب لکڑیاں بیچ کر قابو پانے پر غور شروع کر دیا گیا ہے۔
صوبے کو مالی مشکلات سے نکالنے کے لیے جنگلات میں پڑی ونڈ فال ٹمبر فروخت کرنے پر غور کیا گیا، کل جماعتی کانفرنس میں بریفنگ کے دوران بتایا گیا ہے کہ ونڈ فال ٹمبر فروخت کرنے سے صوبے کو 150 ارب روپے کی آمدنی متوقع ہے۔
ٹمبر فروخت کرنے سے صوبائی حکومت کے پاس خاطر خواہ آمدن آ جائے گی، بریفنگ میں یہ بھی بتایا گیا کہ خیبرپختونخوا کا وفاق کے ذمے 180 ارب روپے واجب الادا ہے، ضم اضلاع کے لیے بھی فنڈز ابھی تک جاری نہیں کیے گئے،جبکہ این ایف سی، آئل اینڈ گیس رائلٹی اور بجلی کے خالص منافع کے حوالے سے بھی غور کیا گیا۔
وزیر اعلیٰ خیبرپختونخوا کی زیر صدارت منعقدہ آل پارٹیز کانفرنس میں سراج الحق، اکرم خان درانی، آفتاب شیر پاؤ، امیر مقام، ایمل ولی خان اور دیگر نے شرکت کی، اجلاس میں تمام سیاسی جماعتوں کے قائدین پر مشتمل جرگہ تشکیل دینے پر اتفاق کیا گیا، جرگہ ممبران صوبے کے مالی مشکلات سے متعلق وزیر اعظم سے ملاقات اور مسائل پر بات کریں گے۔