بالی ووڈ کے معروف ہدایتکار و پروڈیوسر کرن جوہر کو لندن کی سڑکوں پر ایک مداح نے ‘انکل’ کہہ کر پکارا جس کی ویڈیو سوشل میڈیا پر وائرل ہورہی ہے۔
بھارتی میڈیا کے مطابق ان دنوں کرن جوہر اپنے اہلخانہ کے ہمراہ لندن میں چھٹیاں گزار رہے ہیں، فلمساز کو لندن کی سڑکوں پر مداحوں کے ساتھ سیلفیاں لیتے ہوئے بھی دیکھا گیا۔
کرن جوہر کی ایک ویڈیو سوشل میڈیا پر بھی وائرل ہورہی ہے جس میں ایک شخص کرن جوہر کو لندن میں دیکھ کر اُن کی ویڈیو بنانا شروع کردیتا ہے، پھر وہ کہتا ہے کہ مجھے ابھی کرن جوہر نظر آئے ہیں، میں انہیں کیا کہہ کر مخاطب کروں؟
مذکورہ شخص کہتا ہے کہ مجھے انہیں ‘کے جو’ کہنا چاہیے؟ کرن جوہر کہوں یا صرف کرن؟ مسٹر جوہر کہوں یا مسٹر کرن؟
یہ کہتے ہوئے وہ شخص کرن جوہر کے پاس جاتا ہے اور کہتا ہے ‘ہائے انکل’، یہ سُن کر کرن جوہر حیرانی کا اظہار کرتے ہوئے پوچھتے ہیں کہ کیا تم نے مجھے ابھی انکل کہا؟
کرن جوہر یہ کہہ کر وہاں سے چلتے جاتے ہیں جبکہ ویڈیو بنانے والا شخص زور زور سے قہقہے لگانے لگتا ہے۔
یہ ویڈیو جیسے ہی سوشل میڈیا پر وائرل ہوئی تو کرن جوہر کے مداحوں نے ویڈیو بنانے والے شخص پر تنقید کی اور کہا کہ اُنہیں پردیس میں فلمساز کا احترام کرنا چاہیے۔
