وزیراعلیٰ پنجاب مریم نوازشریف کی بیجنگ میں نیشنل پیپلزکانگریس کی اسٹینڈنگ کمیٹی کے وائس چیئرمین لی ہانگ زونگ سے ملاقات ہوئی ہے۔
ایکسپریس نیوز کے مطابق ملاقات میں پاک چین اسٹرٹیجک پارٹنر شپ کو مزید مستحکم کرنے کے عزم پر اتفاق کیا گیا جبکہ لی ہانگ نے پاک چین تعلقات کے فروغ اور مریم نواز کی فیملی کمٹمنٹ کو سراہا۔
وزیراعلیٰ مریم نوازشریف نے اپنے حالیہ دورہ چین کوپولیٹکل لیڈر زکی ینگ جنریشن کیلئے دوستی کی شمع قرار دیا اور کہا کہ چین کے تجربات اورمشاہدات سے فائدہ اٹھا کر پنجاب کی گورننس میں بہتری لانا چاہتے ہیں۔
انہوں نے کہا کہ یہ میرا پہلا باقاعدہ سرکاری دورہ ہے اور یہ چین کے ساتھ برادرانہ تعلقات کے استحکام کی عملی کاوش کا مظہر ہے۔
قبل ازیں آمد پر لی ہانگ زونگ نے وزیراعلیٰ مریم نوازشریف اوران کے وفد کا پرتپاک استقبال کیا اور کہا کہ چینی قیادت پاک چائنہ کوریڈورکے منصوبے کو مزید بہتر بنا کر باہمی تعلقات کو عروج پرلے جانا چاہتی ہے۔
لی ہانگ کا کہنا تھا کہ چائنہ کے گورننس سسٹم، جیو پولیٹیکل امور، ڈویلپمنٹ اورکلچر کے امور پر وزیراعلیٰ مریم نوازشریف کی بصیرت قابل تحسین ہے۔ وزیراعلی پنجاب جیسی متحرک ویژنری شخصیت سے ملنا اعزاز سمجھتا ہوں۔
انہوں نے کہا کہ پنجاب کے عوام کی خدمت کے لئے وزیراعلیٰ کا ویژن قابل تحسین ہیں۔
لی ہانگ کونگ نے پاک چائنہ باہمی تعلقات کے فروغ کیلئے وزیراعلی مریم نوازشریف کی کا وشوں کو بھی سراہا۔ ملاقات میں دونوں ممالک کے باہمی تعلقات کے فروغ اور استحکام کیلئے اقدامات پر اتفاق کیا گیا۔
