پی ٹی اے کا فائیو جی سپیکٹرم آکشن کا دوسرا مرحلہ کل ہوگا

ذرائع کے مطابق اسائنمنٹ بیس آکشن میں 2600 اور 3500 میگا ہرٹز بینڈز کی پوزیشنز کے لیے بولی ہوگی، جس میں ٹاپ، مڈل اور لو فریکوئنسی پوزیشنز پیش کی جائیں گی، اگر کمپنیوں کے درمیان اتفاق نہ ہوا تو پوزیشننگ کے لیے باقاعدہ بولی کا عمل ہوگا۔

ذرائع کا کہنا ہے کہ بولی کی ابتدائی قیمت ایک لاکھ ڈالر رکھی گئی ہے جبکہ دوسرے راؤنڈ میں یہ قیمت ایک ملین ڈالر تک جا سکتی ہے، پی ٹی اے کو پوزیشننگ آکشن سے ایک سے دو ملین ڈالر اضافی آمدن کی توقع ہے۔

نیلامی کے بعد بچ جانے والا سپیکٹرم پی ٹی اے کے پاس ہی رہے گا، ذرائع کے مطابق کچھ ٹیلی کام کمپنیاں عید سے پہلے فائیو جی ٹرائل کی اجازت بھی مانگ رہی ہیں جبکہ عید کے اگلے دن فائیو جی لائسنس جاری کرنے کی تقریب متوقع ہے۔

ذرائع کے مطابق جاز نے 700 میگا ہرٹز سپیکٹرم حاصل کیا ہے جو دیہی علاقوں کے لیے اہم بینڈ سمجھا جاتا ہے، 2600 میگا ہرٹز بینڈ کی ڈیمانڈ زیادہ ہے کیونکہ اس پر فور جی اور فائیو جی دونوں سروسز فراہم کی جا سکتی ہیں، جبکہ 3500 میگا ہرٹز بینڈ کی متعدد لاٹس یوفون نے حاصل کی ہیں۔

یہ بھی بتایا گیا ہے کہ جاز اپنے ٹاورز پر فائیو جی ٹرائل شروع کرنے اور صارفین کو مفت فائیو جی سروس دینے کا خواہشمند ہے۔