کربلا: ربیع الاول کے آغاز کے ساتھ ہی عراق کے شہر کربلا میں روضہ امام حسینؓ کی روشنیاں سرخ سے سبز کردی گئیں۔ یہ تبدیلی محرم الحرام اور صفر کے دو ماہ پر محیط سوگ کے اختتام اور نئے اسلامی مہینے کے آغاز کی علامت سمجھی جاتی ہے۔
روایتی طور پر محرم اور صفر کے دوران روضہ امام حسینؓ اور دیگر مقدس مقامات پر سوگ کی مناسبت سے سرخ روشنیاں نمایاں رہتی ہیں، جبکہ ربیع الاول شروع ہوتے ہی روشنیوں کو سبز کردیا جاتا ہے۔
ربیع الاول کی آمد پر کربلا میں زائرین اور عقیدت مندوں کی بڑی تعداد موجود رہی، جہاں روضہ امام حسینؓ سبز روشنیوں میں نہایت روح پرور منظر پیش کرتا رہا۔
یہ منظر مسلمانوں بالخصوص محبانِ اہل بیتؓ کے لیے ربیع الاول کے آغاز اور اسلامی سال کے اس بابرکت مہینے کے استقبال کی علامت بن گیا۔
