سابق عالمی نمبر ایک نوواک جوکووچ اور چار مرتبہ کی گرینڈ سلیم چیمپئن آرینا سبالینکا کو یو ایس اوپن کے مکسڈ ڈبلز مقابلے میں اپ سیٹ شکست کا سامنا کرنا پڑا، جس کے بعد دونوں کھلاڑی ایونٹ سے باہر ہوگئے۔
تفصیلات کے مطابق چیک ریپبلک کی کیٹرینا سینیاکووا اور برطانیہ کے ہینری پیٹن نے سنسنی خیز مقابلے میں جوکووچ اور سبالینکا پر سبقت حاصل کرتے ہوئے کوارٹر فائنل میں جگہ بنا لی۔
جوکووچ اور سبالینکا نے میچ کا آغاز جارحانہ انداز میں کیا اور پہلے سیٹ میں 4-1 سے کامیابی حاصل کرکے برتری بنالی۔ تاہم سینیاکووا اور پیٹن نے دوسرے سیٹ میں شاندار کم بیک کرتے ہوئے 4-2 سے سیٹ اپنے نام کرلیا۔
فیصلہ کن ٹائی بریکر میں دونوں ٹیموں کے درمیان سخت مقابلہ دیکھنے کو ملا، تاہم سینیاکووا اور پیٹن نے اہم لمحات میں بہترین کھیل کا مظاہرہ کرتے ہوئے 10-2 سے کامیابی حاصل کی اور اگلے مرحلے میں پہنچ گئے۔
سینیاکووا اور پیٹن دونوں اپنے اپنے ڈبلز مقابلوں میں عالمی نمبر ایک کھلاڑی ہیں، جس کا تجربہ انہیں فیصلہ کن مرحلے میں کام آیا۔
کوارٹر فائنل میں فاتح جوڑی کا مقابلہ فرانس کے گیل مونفلس اور یوکرین کی ایلینا سویٹولینا کی جوڑی سے ہوگا۔ شائقین کو ایک اور دلچسپ مقابلے کی توقع ہے۔
جوکووچ اور سبالینکا کی اسٹار جوڑی کی شکست کو یو ایس اوپن مکسڈ ڈبلز کے ابتدائی مرحلے کا بڑا اپ سیٹ قرار دیا جا رہا ہے۔
