پاکستان، سعودی عرب اور ترکیہ کے درمیان مکہ میں طے پانے والے مشترکہ دفاعی معاہدے کے تحت پہلا اجلاس کل استنبول میں ہوگا، جس میں شرکت کے لیے نائب وزیراعظم اور وزیر خارجہ اسحاق ڈار ترکیہ پہنچ گئے ہیں۔
ترجمان دفتر خارجہ کے مطابق استنبول میں ہونے والے اجلاس میں تینوں ممالک کے درمیان دفاعی معاہدے کے خدوخال، پیش رفت اور آئندہ کے لائحہ عمل کا جائزہ لیا جائے گا۔ اسحاق ڈار سرکاری مصروفیات کے سلسلے میں استنبول پہنچے، جہاں ترک حکام نے ان کا استقبال کیا۔
استنبول آمد پر ترکیہ کے ڈپٹی چیف آف اسٹاف برائے انتظامی امور بریگیڈیئر جنرل شنول وارول، ترکیہ میں پاکستان کے سفیر ڈاکٹر یوسف جنید، ترک وزارت خارجہ کے سفیر جیہاد ایرگینے اور دیگر اعلیٰ حکام موجود تھے۔
استنبول پہنچنے کے بعد نائب وزیراعظم و وزیر خارجہ اسحاق ڈار نے حضرت ابو ایوب انصاریؓ کے مزار پر حاضری دی اور فاتحہ خوانی کی۔ اس موقع پر انہوں نے پاکستان اور پاکستانی عوام کی سلامتی، امن اور خوش حالی کے لیے دعا کی جبکہ امت مسلمہ کے اتحاد کے لیے بھی خصوصی دعا کی۔
اسحاق ڈار اپنے دورۂ ترکیہ کے دوران اہم سرکاری ملاقاتیں بھی کریں گے، جن میں دوطرفہ تعلقات، علاقائی صورتحال اور دفاعی تعاون سمیت باہمی دلچسپی کے مختلف امور پر تبادلہ خیال متوقع ہے۔
تینوں ممالک کے درمیان دفاعی تعاون میں اضافے کے لیے ہونے والا یہ اجلاس مکہ میں طے پانے والے معاہدے پر عمل درآمد کی جانب اہم پیش رفت قرار دیا جارہا ہے۔
