لاہور ہائیکورٹ ‘ تمام میڈیکل کالجز کو افغان طلباء کو نکالنے سے روکتے ہوئے سماعت 18 ستمبر تک ملتوی

لاہور (کورٹ رپورٹر)لاہور ہائیکورٹ کے جسٹس خالد اسحاق نے پنجاب کے تمام میڈیکل کالجز کو افغان طلباء کو نکالنے سے روکتے ہوئے سماعت 18 ستمبر تک ملتوی کردی، 30 سے زائد افغان طلباء کی درخواستوں پر سماعت کے دوران وکیل پی ایم سی نے موقف اپنایا کہ افغان طلباء کے پاس درست ویزہ موجود نہیں ہے،عدالت نے استفسار کیا داخلہ دیتے ہوئے ایجوکیشن ویزہ کیسے دیا تھا؟چار چار سال انکی زندگی کے ضائع کردیے اب واپس بھیج رہے ہیں، پی ایم ڈی سی کو شاہی حکم آیا جس کے بعد نوٹیفکیشن جاری کردیا۔ طلباء کو نکالنے سے پہلے ایک بار تو ان طلباء کو سن لیتے، جب ان پر پیار آیا ہوا تھا تب پوری دنیا میں ڈھنڈورا پیٹ رہے تھے، کل تک فیورٹ چائلڈ تھے آج پالیسی تبدیل ہوگئی، آپ انکو بھی بھیج دیں مگر میڈیکل کی تعلیم مکمل ہونے کے بعد، وکیل پی ایم ڈی سی نے کہا کہ پوری دنیا کا اصول ہے کہ ویلڈ ویزہ نہ ہو تو آپ رہ نہیں سکتے، امریکہ میں بھی درست ویزہ کے بغیر نہیں رہ سکتے،عدالت نے ریمارکس دیئے کہ امریکہ کی عدالتیں آزاد ہیں اور پاکستان میں بھی عدالتیں آزاد ہیں، آپ ان طلباء کو سزائے موت ہی دے دیں، وکیل پی ایم ڈی سی نے کہا سر یہ ریاستی سکیورٹی کا مسئلہ ہے، عدالت نے کہاکوئی ریاستی سکیورٹی کا معاملہ نہیں ہے،کوئی میڈیکل کالج کسی طالب علم کو نہ نکالے گا نہ ہی انکا پیپر کینسل کرے گا۔