گیس سیکٹرکا 3 ہزار 600 ارب کا گردشی قرض 3 سال میں ختم کرنیکا پلان تیار

اسلام آباد ( این این آئی) گیس سیکٹر کا گردشی
قرض 3ہزار 600ارب روپے تک پہنچ گیا،جس میں 2ہزار 100ارب روپے سود اور ایک ہزار 500ارب روپے اصل قرض شامل ہے۔آئی ایم ایف کے ساتھ ورچوئل اقتصادی جائزہ مذاکرات ستمبر کے آخری ہفتے میں ہوں گے، وزارت خزانہ کی جانب سے گیس سیکٹر کے گردشی قرض کے سیٹلمنٹ پلان سے ادارے کو آگاہ کیا جائے گا۔ذرائع کاکہنا ہے کہ گیس سیکٹرکا 3ہزار 600ارب روپے کاگردشی قرض 3سال میں ختم کرنے کا پلان تیار کر لیاگیا ہے،پہلے سال گردشی قرض میں 528 ارب،دوسرے سال 473 ارب جبکہ تیسرے سال 433 ارب روپے کمی کا تخمینہ لگایا گیا ہے۔پلان کے تحت گیس کمپنیوں کے 840ارب روپے کے ڈیویڈنڈ سے گردشی قرض کم کیا جائے گا،پیٹرولیم لیوی سے 270 ارب روپے حاصل ہونے کا تخمینہ ہے۔قطر سے ایل این جی کے اضافی کارگوزموخر کرنے سے 310ارب روپے،پاور سیکٹر کے ٹیک اینڈ پے سے 15ارب جبکہ ایل این جی کی مکمل لاگت وصولی سے 60 ارب روپے گردشی قرض کم کرنے کا منصوبہ ہے۔ذرائع کے مطابق گیس سیکٹر کے گردشی قرض پر عائد مارک اپ کا معاملہ بھی سیٹل کیا جائے گا، ایل این جی کی مکمل لاگت وصول کرنے سے گیس کی قیمتیں بڑھنے کا خدشہ ہے۔