جعلی ویڈیو وائرل کیس’عظمیٰ بخاری کی توہین عدالت درخواست پر فیصلہ محفوظ

لاہور (کورٹ رپورٹر) جوڈیشل مجسٹریٹ ضلع کچہری نعیم وٹو نے جعلی ویڈیو وائرل کرنے کے مقدمے میں وکیل علی اشفاق کیخلاف عظمیٰ بخاری کی ت وہین عدالت کی درخواست اور حاضری معافی کی درخواست پر فیصلہ محفوظ کر لیا۔ عدالت میں پی ٹی آئی کی سوشل میڈیا ایکٹوسٹ فلک جاوید سمیت دیگر ملزمان کے خلاف کارروائی جاری ہے، عظمی بخاری نے فلک جاوید کے وکیل میاں علی اشفاق کے خلاف توہین عدالت کی درخواست دائر کر دی، جس پر فریقین کے وکلا نے دلائل دیئے۔ عظمی بخاری کے وکیل نے موقف اختیار کیا کہ گزشتہ سماعت پر وکیل علی اشفاق نے صوبائی وزیر کے وارنٹ گرفتاری جاری کرنے کے لیے عدالت پر دبائو ڈالنے کی کوشش کی جبکہ عدالت کو پریشرائز یا دبائو میں لانا توہین عدالت کے زمرے میں آتا ہے لہٰذا فلک جاوید کے وکیل کے خلاف توہین عدالت کی کارروائی کی جائے، وکیل نے کہا کہ دبائو سے متعلق عدالت نے اپنے گزشتہ فیصلے میں بھی تحریر کیا ہے، عدالتیں کبھی کسی کے دبائو میں نہیں آتیں اور یہ کہنا کہ عدالت مدعیہ کے دبائو میں ہے’ سراسر غلط ہے۔ انہوں نے مزید کہا کہ کمرہ عدالت میں مین اسٹریم میڈیا کی موجودگی پر کوئی اعتراض نہیں، تاہم سوشل میڈیا پر جھوٹ پھیلانے والوں سے مسئلہ ہے گزشتہ سماعت پر ایک یوٹیوبر نے معافی بھی مانگی تھی جبکہ آج بھی ایک شخص عدالت میں موجود ہے جو مسلسل جھوٹ پھیلاتا ہے۔ وکیل نے الزام عائد کیا کہ عدالتی کارروائی کے بعد سوشل میڈیا پر ٹویٹس کئے جاتے ہیں اور میاں علی اشفاق کو سوشل میڈیا ایکٹوسٹس کی حمایت حاصل ہے۔ دوسری جانب میاں علی اشفاق نے توہین عدالت کی درخواست کے خلاف دلائل دیتے ہوئے کہا کہ گزشتہ سماعت پر عظمی بخاری جرح کیلئے عدالت میں پیش نہیں ہوئیں، عدالتی احکامات کے باوجود مدعیہ پیش نہ ہو تو قانون میں وارنٹ جاری کرنے کی گنجائش موجود ہے، انہوں نے کہا کہ توہین عدالت کی درخواست عدالتی کارروائی میں تاخیر کی کوشش ہے اور انہوں نے ایسی درخواست پہلے کبھی نہیں دیکھی، دوران سماعت وکلا کے درمیان تلخ جملوں کا تبادلہ بھی ہوا جس پر عدالت نے فریقین کو قانونی دلائل تک محدود رہنے کی ہدایت کی۔ عظمی بخاری کے وکیل نے مزید موقف اختیار کیا کہ ملزمہ فلک جاوید کو عدالت میں پیش نہ کرنا بڑی زیادتی ہے، وہ اس مقدمے میں ضمانت پر ہیں اور انہیں ہر صورت عدالت پیش کیا جانا چاہئے تھا۔ وکیل فلک جاوید نے عظمی بخاری کی حاضری معافی کی درخواست کی مخالفت کرتے ہوئے عدالت سے ان کے وارنٹ گرفتاری جاری کرنے کی استدعا کی، عظمی بخاری کے وکیل نے بتایا کہ ایک درخواست لاہور ہائیکورٹ میں زیر التوا ہے اور پیر سے اس پر باقاعدہ کارروائی شروع ہونی ہے۔