ڈئی آئی جی آپریشنز کا اپنے دفتر میں کھلی کچہری کا انعقاد’ شکایات سنیں

لاہور (کرائم رپورٹر) ڈی آئی جی آپریشنز فیصل کامران نے اپنے دفتر میں روزانہ کی بنیاد پر کھلی کچہری کا انعقاد کیا۔ کھلی کچہری میں دھمکیوں، ہراسگی، گھریلو تشدد اور جائیداد کے تنازعات کی شکایات موصول ہوئیں۔ فیصل کامران نے جعلسازی کی شکایت پر ایس ایچ او ڈیفنس بی کو شواہد کی روشنی میں کارروائی کی ہدایت کی۔ سابقہ سسرال کی ہراسگی کی شکایت پر ایس ایچ او سندر کو خاتون کو تحفظ دینے کا حکم دیا۔ گھریلو تشدد، ہراسگی اور دھمکیوں کی شکایت پر فیصل کامران نے ایس ایچ اوز اقبال ٹائون، شیرا کوٹ کو بھی فوری کارروائی کی ہدایت کیں۔ ڈی آئی جی آپریشنز نے داماد کے خلاف شکایت پر ایس ایچ او اچھرہ کو تصدیق کے بعد کارروائی کا حکم دیا۔ فیصل کامران نے ریڑھی بان پر تشدد کی شکایت پر ایس ایچ او بادامی باغ کو فوری کارروائی کی ہدایت کی۔ فیصل کامران نے کہا کہ شہریوں کی شکایات پر فوری اور قانون کے مطابق کارروائی یقینی بنائی جائے گی۔ انہوں نے کہا کہ ہفتے میں چھ روز دوپہر ایک سے تین بجے تک کھلی کچہری جاری رہتی ہے جبکہ اتوار کو دن 12 بجے فیس بک پر آن لائن کھلی کچہری بھی کرتا ہوں۔