سکیورٹی کونسل کی سعودی عرب پر حوثی حملوں کی شدید مذمت

نیویارک (آئی این پی)اقوام متحدہ کی سلامتی کونسل نے حوثیوں کی جانب سے سعودی عرب پر جاری حملوں کی سخت الفاظ میں مذمت کی  ہے۔میڈیا رپورٹس کے مطابق جاری موقف میں کونسل نے خاص طور پر سعودی عرب کے شہریوں اور توانائی کے بنیادی ڈھانچے کو نشانہ بنانے والے حملوں پر تشویش ظاہر کی جن میں خواتین اور بچوں سمیت شہری زخمی ہوئے۔سلامتی کونسل نے حوثیوں سے فوری طور پر فوجی کشیدگی اور سعودی عرب پر حملے روکنے کا مطالبہ کیا۔کونسل نے سعودی عرب کے اپنے دفاع کے حق کو بین الاقوامی قانون کے مطابق تسلیم کیا۔ بحیرہ احمر اور باب المندب میں تجارتی جہازوں کو لاحق خطرات اور حملوں کی بھی مذمت کی گئی۔رکن ممالک نے حوثیوں تک اسلحہ، فوجی تربیت، تکنیکی معاونت اور مالی وسائل کی رسائی روکنے کے لیے عملی اقدامات پر زور دیا۔اقوام متحدہ کے مطابق ستمبر کے آغاز سے یمن میں لڑائی کے باعث کم از کم 125,000 افراد بے گھر ہو چکے ہیں۔