صدر آصف زرداری قومی مفاہمت کے علمبردار ہیں، نرگس فیض ملک

لاہور (خبر نگار) پاکستان پیپلز پارٹی وومن ونگ پنجاب کی جنرل سیکرٹری اور ممبر پنجاب اسمبلی نرگس فیض ملک نے کہا ہے کہ صدر مملکت آصف علی زرداری قومی مفاہمت کے علمبردار ہیں۔ انہوں نے ہر دور میں بردباری کی بنیاد پر قومی سطح پر سیاسی رواداری کو فروغ دیا۔ صدر مملکت آصف علی زرداری آج بھی آزاد کشمیر اور گلگت بلتستان سمیت چاروں صوبوں میں یکساں مقبول اور جمہوری قوتوں کیلئے قابل قبول ہیں۔ انہوں نے کہا کہجمہوری قوتوں کے درمیان ایک پل کا کردار ادا کیا۔ انہوں نے بی بی بینظیر بھٹو کی شہادت کے باوجود پاکستان کھپے کا زوردار نعرہ لگایا اور ملک کو انتشار سے بچایا۔ وہ اپنے اعزاز میں ایک پروقار استقبالیہ سے خطاب کر رہی تھیں۔ نرگس فیض ملک نے مزید کہا کہ صدر مملکت آصف علی زرداری کے فلسفہ سیاست اور فلسفہ مفاہمت سے حکمرانوں کو سیکھنے کی ضرورت ہے۔ افسوس وفاقی حکومت مذاکرات کی اہمیت سے نابلد ہے۔ انہوں نے کہا کہ جمہوری دور حکومت تو درکنار عوام آمرانہ ادوار میں بھی احتجاج کیا کرتے ہیں۔ مرکز میں پاکستان مسلم لیگ (ن) کے حکمران احتجاج کرنیوالی مختلف سیاسی پارٹیز کے ساتھ سنجیدہ مذاکرات کا اہتمام اور ان کا اعتماد بحال کریں۔ سیاسی تنازعات بارے مذاکرات اور احتجاج دونوں جمہوری نظام کی اساس ہیں۔ انہوں نے کہا کہ پرامن احتجاج عوام کا بنیادی انسانی اور آئینی حق ہے، جس سے کوئی انکار نہیں کرسکتا۔ یقیناً یہ حق قانون کی حدود سے تجاوز کئے بغیر استعمال کیا جاسکتا ہے۔ انہوں نے کہا کہ وفاقی حکومت پرامن احتجاج کے جمہوری حق کو دبانے کیلئے ضرورت سے زیادہ سخت ایکشن سے گریز کرے۔ خواتین سمیت سیاسی کارکنان کی حالیہ گرفتاریوں کا کوئی جواز نہیں، اسیران کو رہا کیا جائے۔ انہوں نے کہا کہ شاہراہوں اور شہروں کی بندش سے عام شہری بھی بیحد متاثر ہوتے ہیں۔ حکومت احتجاجی مظاہرین کیخلاف طاقت استعمال کرنے کی بجائے نتیجہ خیز مذاکرات کاراستہ اختیار کرے۔