پنجاب میں فلو کیسز میں اضافہ صوبے کے سرکاری ہسپتالوں میں فلو ویکسین ندارد

لاہور (جنرل رپورٹر) پنجاب میں فلو کے کیسز میں اضافے کے دوران لاہور سمیت صوبے کے بڑے سرکاری ہسپتالوں میں فلو ویکسین کی عدم دستیابی نے محکمہ صحت کی ویکسین پروکیورمنٹ پالیسی پر سوالات اٹھا دیئے۔ ذرائع کے مطابق سرکاری سطح پر فلو ویکسین کی بروقت خریداری نہ ہونے کے باعث شہریوں کو ویکسین کے حصول کے لیے نجی مارکیٹ کا رخ کرنا پڑ رہا ہے جہاں انہیں اضافی مالی بوجھ برداشت کرنا پڑ رہا ہے۔ ذرائع کا کہنا ہے کہ ماضی میں فلو ویکسین کی پروکیورمنٹ ڈی جی ہیلتھ آفس کی سطح پر کی جاتی رہی ہے تاہم رواں سیزن میں تاحال سرکاری خریداری مکمل نہیں ہو سکی، جس کے باعث سرکاری ہسپتالوں میں ویکسین کی فراہمی کا نظام متاثر ہے۔ فلو سے بچائو کے لیے سرکاری ہسپتال آنے والے شہریوں کو ویکسین دستیاب نہ ہونے کی صورت میں نجی فارمیسیوں سے خریداری کرنا پڑ رہی ہے۔ ذرائع کے مطابق مارکیٹ میں چائنیز فلو ویکسین تقریبا1500 روپے جبکہ ملٹی نیشنل کمپنیوں کی ویکسین 2000 روپے سے زائد میں فروخت ہو رہی ہے۔ یوں سرکاری سطح پر مفت یا کم قیمت ویکسین کی عدم دستیابی شہریوں کے لیے براہ راست اضافی اخراجات کا سبب بن رہی ہے۔ محکمہ صحت کے ذرائع کے مطابق ڈی جی ہیلتھ آفس کی جانب سے پہلے جاری کیے گئے اشتہار میں حصہ لینے والی کمپنیوں میں سے مطلوبہ عالمی ادارہ صحت معیار کے مطابق اہل کمپنیاں دستیاب نہ ہونے کے باعث خریداری کا عمل آگے نہیں بڑھ سکا۔ محکمہ صحت کا کہنا ہے کہ نیا اشتہار جلد جاری کیا جارہا ہے جس کے بعد قواعد و ضوابط کے مطابق فلو ویکسین کی خریداری ممکن ہو سکے گی۔ تاہم فلو سیزن کے دوران ویکسین کی بروقت دستیابی نہ ہونے پر سوال اٹھ رہا ہے کہ اگر خریداری کے عمل میں رکاوٹ پہلے ہی سامنے آگئی تھی تو متبادل انتظامات بروقت کیوں نہ کیے گئے۔ شہریوں کا کہنا ہے کہ وبائی امراض اور موسمی بیماریوں سے بچائو کے لیے ضروری ویکسین کی فراہمی میں تاخیر کا براہ راست بوجھ عوام کو نجی مارکیٹ سے مہنگی ویکسین خرید کر اٹھانا پڑ رہا ہے۔