ترقیاتی منصوبوں کی بروقت تکمیل سندھ حکومت کی ترجیح ہے: شرجیل میمن

کراچی(این این آئی) سندھ کے سینئر وزیر شرجیل انعام میمن نے کہا ہے کہ حکومت سندھ کی اولین ترجیح ترقیاتی منصوبوں کی بروقت تکمیل ہے تاکہ عوام کو ان کے ثمرات جلد حاصل ہوسکیں۔ایک بیان میں انہوں نے کہا کہ پاکستان پیپلز پارٹی کی سندھ حکومت نے 13 ہزار سے زائد ترقیاتی اسکیمیں شروع کیں، جن میں 9 ہزار سے زیادہ مکمل ہوچکی ہیں۔شرجیل انعام میمن نے کہا کہ سیلاب سے متاثرہ علاقوں میں 724 کلومیٹر سڑکوں کی بحالی کے منصوبوں پر بھی کام جاری ہے اور ان میں 80 فیصد سے زیادہ کام مکمل کیا جاچکا ہے۔انہوں نے کہا کہ جدید عوامی سفری نظام کو وسعت دینا بھی حکومت کی ترجیحات میں شامل ہے۔ اورنج لائن اور گرین لائن بس تیز رفتار نظام کے ذریعے لاکھوں افراد کو سفری سہولیات فراہم کی جارہی ہیں جبکہ یلو لائن اور ریڈ لائن بس تیز رفتار نظام کے مختلف تعمیراتی حصوں پر بھی کام تیزی سے جاری ہے۔سینئر وزیر نے کہا کہ مزید نئی برقی بسیں اور دو منزلہ بسیں بھی جلد کراچی پہنچ جائیں گی۔ حکومت ترقیاتی منصوبوں کی بروقت تکمیل پر توجہ دے رہی ہے تاکہ شہریوں کو بہتر سہولیات کی فراہمی ممکن بنائی جاسکے۔