سابق صدر چیمبر ناصر خان کا چینی سفیر جیانگ زائی کے اعزاز میں عشائیہ

اسلام آباد )نامہ نگار خصوصی(اسلام آباد چیمبر آف کامرس کے سابق صدر اور معروف کاروباری شخصیت ناصر خان کی جانب سے اپنی رہائش گاہ پر چینی سفیر جیانگ زائی ڈونگ کے اعزاز میں عشائیہ دیا گیا، جس میں چینی سفیر سمیت دیگر سینئر سفارت کاروں اور معزز شخصیات نے شرکت کی۔ناصر خان اور ان کے مرحوم بھائی رضا خان کے چین کے ساتھ کئی دہائیوں پر محیط برادرانہ، دوستانہ اور تاریخی تعلقات رہے ہیں۔ عشائیے کے موقع پر چینی سفیر جیانگ زائی ڈونگ نے غیر رسمی گفتگو کرتے ہوئے کہا کہ پاکستان ہمارے لیے دوسرا گھر ہے، ناصر خان کی رہائش گاہ پر آنا میرے لیے باعثِ مسرت ہے۔ انہوں نے کہا کہ پاک چین دوستی اور باہمی تعلقات کے فروغ میں ناصر خان کا کردار قابلِ تحسین ہے۔چینی سفیر نے کہا کہ پاکستان چین کا قابلِ فخر دوست ہے، پاکستان کی ترقی اور خوشحالی چین کی ترقی اور خوشحالی ہے۔ پاک چین دوستی خطے میں پائیدار امن، استحکام اور ترقی کی علامت ہے۔ دونوں ممالک کے تعلقات ایک نئے دور میں داخل ہو چکے ہیں اور آنے والے وقت میں یہ تعلقات مزید مضبوط اور مستحکم ہوں گے۔اس موقع پر ناصر خان نے چینی سفیر جیانگ زائی ڈونگ کی اپنی رہائش گاہ آمد پر ان کا شکریہ ادا کرتے ہوئے کہا کہ پاک چین باہمی تعلقات ہمیشہ سے مضبوط اور مثالی رہے ہیں اور آنے والے دور میں دونوں ممالک کے تعلقات مزید نئی بلندیوں کو چھوئیں گے۔