مائیکروسافٹ کی سروسز دنیا بھر میں متاثر، صارفین کو شدید مشکلات

نیویارک (آئی این پی) دنیا بھر میں مائیکروسافٹ کی مختلف سروسز میں خرابی کے باعث صارفین کو مشکلات کا سامنا کرنا پڑا، متاثرہ سروسز میں مائیکرو سافٹ ٹیمز، آئوٹ لک اور مصنوعی ذہانت کا سافٹ ویئر کو پائلٹ بھی شامل ہیں۔ مائیکروسافٹ نے سروسز میں تعطل کی تصدیق کرتے ہوئے کہا کہ کمپنی کنکشن کے مسائل دور کرنے کیلئے کام کر رہی ہے۔کمپنی کے مطابق اس کے انفراسٹرکچر کے ایک حصے پر غیر معمولی دبائو بڑھ گیا تھا جس کے باعث صارفین کو سروسز تک رسائی میں مشکلات پیش آئیں۔ مائیکروسافٹ کا کہنا ہے کہ یہ مسئلہ صارفین کی جانب سے ٹریفک میں اضافے کے باعث نہیں بلکہ متعدد سروسورز اچانک دستیاب نہ ہونے کی وجہ سے پیدا ہوا جس سے باقی سرورز پر دبائو بڑھ گیا۔ آٹیج کی نگرانی کرنے والی ویب سائٹ ڈائون ڈیٹیکٹر کے مطابق برطانیہ اور امریکا میں بڑی تعداد میں صارفین نے مائیکروسافٹ کی سروسز متاثر ہونے کی شکایات درج کرائیں، امریکا میں صرف آٹ لک کے حوالے سے ایک لاکھ 31 ہزار سے زائد شکایات سامنے آئیں۔ مائیکروسافٹ نے مزید بتایا کہ مسئلے کے حل کیلئے سرورز کی ترتیبات میں تبدیلی کا تجربہ کیا جارہا ہے تاکہ سرورز کی خودکار جانچ کے دوران پیدا ہونے والی خرابی دور کی جاسکے۔