وکلاءکی ہڑتال،بائیکاٹ, چیف جسٹس کا پتلا بنا کر افسوسناک اقدام

راولپنڈی لاہور /ملتان/سرگودھا/فیصل آباد /کراچی (نمائندگان خبریں) لاہور ہائی کورٹ اور وکلا کے درمیان ڈیڈلاک مسلسل برقرار ہے اور وکلا نے ملک کے مختلف شہروں میں ہڑتال کرتے ہوئے عدالتی کارروائی کا مکمل بائیکاٹ کیا جس کے باعث سائلین کو پریشانی کا سامنا کرنا پڑا۔ ملتان بار کے صدر کو بچانے کے لیے وکلا ایک ہوگئے۔ ملتان بار صدر کے وارنٹ گرفتاری جاری ہونے کے خلاف ملک کے مختلف شہروں میں وکلا نے ہڑتال کی، ضلع کچہری کے سامنے چیف جسٹس لاہور ہائیکورٹ کا پتلا بھی نذر آتش کیا۔ وکلا کے حاضر نہ ہونے کے باعث کیسوں کی سماعت نہ ہو سکی اور عدالتوں میں مقدمات کی نئی تاریخیں دی گئیں۔ وکلا رہنماوں نے چیف جسٹس لاہور ہائی کورٹ پر جانبداری کا الزام لگاتے ہوئے صدر ملتان بار کے خلاف قانونی کارروائی روکنے کا مطالبہ کیا۔ملتان میں ڈنڈا بردار وکلا نے چوک کچہری میں دھرنا دیا اور چیف جسٹس لاہور ہائیکورٹ کیخلاف احتجاج کیا۔ سرگودھا میں ڈسٹرکٹ بار سے ڈی پی او چوک تک ریلی نکالی گئی۔ سرگودھا میں بھی ملتان بار اور لاہور کے وکلا کے ساتھ اظہار یکجہتی کے لیے ڈسٹرکٹ بار کے وکلا نے ریلی نکالی۔کراچی میں ایم اے جناح روڈ پر وکلا نے احتجاج کیا۔ کراچی میں وکلا رہنما محمود الحسن نے کہا کہ نہ تو ہائی کورٹ اور نہ سپریم کورٹ کا کوئی جج مقدس گائے ہے۔ صدر کراچی بار نعیم قریشی نے چیف جسٹس لاہور ہائی کورٹ پر جانبداری الزام لگایا۔ فیصل آباد میں وکلا نے ہڑتال کی اور عدالتوں میں پیش نہیں ہوئے، جبکہ سیشن کورٹ کے گیٹ کے سامنے احتجاجی کیمپ لگایا گیا۔ راولپنڈی بار میں بھی وکلا نے مکمل ہڑتال کی جس کے باعث ججز بھی عدالتوں میں نہیں بیٹھے اور سائلین کو پریشانی کا سامنا کرنا پڑا۔ سندھ ہائی کورٹ میں وکلا کی ہڑتال کے باوجود مقدمات کی سماعت جاری رہی۔ملتان بار کے صدر شیر زمان قریشی کو تاحال گرفتار نہیں کیا جاسکا۔ عدالت نے گرفتاری کے لیے پولیس کو 8 ستمبر تک مہلت دیدی۔ واضح رہے کہ شیرزمان قریشی نے 24جولائی کو ملتان کے جج سے بدتمیزی کی تھی جس کے بعد ان کے اور سینئر جج جسٹس قاسم خان کے درمیان شدید تلخ کلامی ہوئی تھی اور معاملہ بڑھنے پر فاضل جج سماعت چھوڑ کر اپنے چیمبر میں چلے گئے تھے جب کہ وکلا نے کمرہ عدالت کے باہر لگی جج کے نام کی تختی اکھاڑ کر پھینک دی تھی۔ چیف جسٹس لاہور ہائی کورٹ جسٹس منصور علی خان نے عدالتی تقدس مجروح کرنے کا نوٹس لیتے ہوئے ملتان بار کے صدر شیر زمان قریشی کے وارنٹ گرفتاری جاری کیے تھے۔ لاہور ہائیکورٹ میں ملتان بار توہین عدالت کیس کی سماعت۔آر پی او ملتان سلطان اعظم تیموری کی جانب سے صدر ہائیکورٹ بار ملتان شیر زمان قریشی کی گرفتاری کے متعلق رپورٹ عدالت میں پیش کر دی گئی ۔رپورٹ کے مطابق ملتان پولیس کی جانب سے صدر ہائیکورٹ بار ملتان شیر زمان قریشی کی گرفتاری کے لیے متعدد چھاپے مارے گئے مگر ابھی تک شیر زمان قریشی کی گرفتاری عمل میں نہ لائی جا سکی۔تفصیلات کے مطابق گزشتہ روز لاہور ہائیکورٹ میں ملتان بار توہین عدالت کیس کی سماعت کے موقع پر چیف جسٹس لاہورہائیکورٹ نے صدر ہائیکورٹ بار ملتان شیر زمان قریشی کو گرفتار کر کے پیش کرنے کا حکم جاری کرتے ہوئے آر پی او ملتان سلطان اعظم تیموری کوتوہین عدالت کے مرتکب شیر زمان قریشی کو گرفتار کر کے عدالت میں پیش کرنے کا حکم جاری کیا تھا۔