ممبئی(شوبز ڈیسک) بالی وڈ سائنس فکشن فلم سیریز کرش کا شمار کامیاب ترین سیریز میں ہوتا ہے جس کی چوتھی فلم پر کام کرنے کی تیاریاں زوروں سے جاری ہیں ۔ اگرچہ تاحال فلم کی ٹیم نے کرش سیریز کی چوتھی فلم کی کاسٹ اور اس کی شوٹنگ شروع کرنے کے حوالے سے حتمی طور پر کچھ نہیں بتایا، تاہم خیال کیا جا رہا ہے کہ اس کی شوٹنگ آئندہ چند ماہ میں شروع کی جائے گی۔کرش 4 کی ہیروئن کے لیے پہلے پریانکا چوپڑا کو کاسٹ کیے جانے کی چہ مگوئیاں کی جا رہی تھیں کیوں کہ اب تک وہ اسی سیریز کی 2فلموں میں کام کرچکی ہیں۔پریانکا چوپڑا کرش کی آخری دونوں فلموں میں ایکشن میں دکھائی دی تھیں، اور خیال کیا جا رہا تھا کہ کرش 4 میں بھی انہیں کاسٹ کیا جائے گا۔تاہم اب اطلا عا ت ہیں کہ فلم کی ٹیم ان کی جگہ کترینہ کیف کو کاسٹ کرسکتی ہے ۔ دکن کیرونیکل کے مطابق راکیش روشن اور ریتک روشن کی اس چوتھی فلم کے لیے کترینہ کیف کو کاسٹ کرنے پر غور شروع کردیا گیا۔
نشریاتی ادارے نے اپنے ذرائع سے خبر دی کہ زندگی نہ ملے گی دوبارہ جیسی فلم میں ریتک روشن کے ساتھ کام کرنے والی کترینہ کو کرش 4 میں کاسٹ کیے جانے سے متعلق فلم کی ٹیم سنجیدگی سے غور کر رہی ہے۔ذرائع کے مطابق فلم کی ٹیم سمجھتی ہے کہ کترینہ کیف کے فلمی کیریئر کو اس وقت مصالحہ اور ایکشن سے بھرپور فلم کی ضرورت ہے، جس وجہ سے انہیں پریانکا کی جگہ کاسٹ کیے جانے کا امکان ہے۔تاہم اس حوالے سے حتمی طور پر کچھ بھی کہنا قبل از وقت ہے، کیوں کہ فلم کی ٹیم اور اداکارہ نے اس حوالے سے کوئی بیان جاری نہیں کیا۔
