تنقید نامناسب, چیئرمین نیب کا مخالفین کو بڑا جواب

اسلام آباد( آن لائن) چیئرمین نیب قمرالزمان چودھری نے کہا ہے کہ نیب کے ادارے پر بلا وجہ تنقید کرنا مناسب نہیں ہے،ہم قانون پر عملدرآمد کررہے ہیں ،اگر کوئی قانون شکنی کریں تو ضرور نشاندہی کی جائے۔تفصیلات کے مطابق میڈیا سے گفتگو کرتے ہوئے ان کا کہنا تھا کہ حکومت اور اپوزیشن نیب پر تنقید کرتی ہے،نیب اور اس کے افسران نے کبھی کوئی غلط کام نہیں کیا،میں اس مشکل وقت میں نیب کے افسروں اور اہلکاروں کے ساتھ کھڑا ہوں۔نیب افسروں کی حوصلہ شکنی نہ کی جائے ،بلوچستان میں نیب افسران بغیر کسی سیکیورٹی کے اپنی تمام ترخدمات سرانجام دیتے ہیں۔ان کا کہنا تھا کہ نیب نے ہمیشہ قانون کے مطابق ہی اپناکام کیا ،ادارہ بلوچستان کے خزانے میں3 ارب روپے کی رقم جمع کروا رہا ہے۔انہوں نے کہا کہ نیب بلوچستان میں مخدوش سیکیورٹی صورتحال میں کام کررہی ہے، تمام افسران نے اس کیس میں دن رات محنت کی ہے۔پلی بارگین کا قانون نیب کا بنایا ہوا نہیں ہے جبکہ مشتاق رئیسانی کی پلی بارگین قانون کے عین مطابق ہے۔ چیئر مین نیب کا کہنا تھا کہ نیب مشکل حالات میں بھی بلوچستان اور پاکستان کے عوام کی لوٹی ہوئی رقم برآمد کررہی ہے، ادارہ کوئی بھی رقم اپنی جیب میں نہیں ڈال رہا۔