آسٹریلین اوپن کا آغاز آج ہوگا ،جوکووچ ٹائٹل کا دفاع کریں گے

میلبورن (اے پی پی)سال کے پہلے گرینڈ سلیم آسٹریلین اوپن کا آغاز (آج) پیر سے ہوگا۔ نوویک جوکووچ ریکارڈ ساتویں آسٹریلین اوپن ٹائٹل کیلئے فرنینڈو ورڈاسکو کے خلاف مہم کا آغاز کریں گے۔ اینڈی مرے اور راجر فیڈرر کا کوارٹرفائنل میں جوڑ پڑ سکتا ہے۔، سرینا ولیمز بلینڈا اور دفاعی چیمپئن اینجلیق کربر لیسیا کے خلاف پہلے راﺅنڈ سے مہم شروع کریں گی۔ تفصیلات کے مطابق آسٹریلین اوپن (آج) پیر سے میلبورن میں شروع ہوگا، دو ہفتے تک جاری رہنے والے میگا ایونٹ میں نویک جوکووچ مینز سنگلز اور اینجلیق کربر ویمنز سنگلز میں اعزاز کا دفاع کریں گی۔ آسٹریلین اوپن کے ڈراز کا اعلان کر دیا گیا ہے، ٹاپ سیڈ اینڈی مرے اور 17 مرتبہ کے گرینڈسلام چیمپئن راجر فیڈرر ایک گروپ میں شامل ہیں، مرے پہلے راﺅنڈ میں یوکرین کے مرچنکو کے آمنے سامنے ہوں گے اور کوارٹرفائنل میں انہیں ممکنہ طور پر سیڈ نمبر 17 فیڈرر کا سامنا کرنا پڑ سکتا ہے، جاپان کے کائی نیشکوری بھی انہی کے گروپ میں شامل ہیں، سیکنڈسیڈ سربین سٹار جوکووچ اسپین کے فرننڈو ورڈسکو کے خلاف مہم شروع کریں گے، رافیل نڈال کو پہلے راﺅنڈ میں جرمن پلیئر فلورین میئر کا چیلنج درپیش ہو گا، ویمنز سنگلز ڈراز کے تحت دفاعی چیمپئن اینجلیق کربر ابتدائی راﺅنڈ میں لیسیا کے مدمقابل ہوں گی جبکہ سابق عالمی نمبر ایک سرینا ولیمز بلینڈا سے نبردآزما ہوں گی۔