ہوبارٹ(اے پی پی) آسٹریلین نیشنل جونیئر ہاکی چیمپئن شپ میں پاکستان نے دفاعی چیمپئن وکٹوریا کو ابتدائی میچ میں کانٹے دار مقابلے کے بعد 2-1 گولز سے ہرا کر فاتحانہ آغاز کیا۔ غضنفر علی اور احمد ندیم نے گولز کر کے ٹیم کو فتح سے ہمکنار کرایا۔ بدھ کو آسٹریلیا میں شروع ہونے والی جونیئر چیمپئن شپ میں پاکستانی جونیئر ٹیم نے شاندار کھیل پیش کرتے ہوئے دفاعی چیمپئن وکٹوریا کو 1 کے مقابلے میں 2 گولز سے ہرا کر کامیابی حاصل کی۔ گرین شرٹس کی جانب سے غضنفرعلی اور احمد ندیم نے ایک، ایک گول کر کے ٹیم کو کامیابی دلائی۔اس سے قبل گزشتہ روزگرین شرٹس نے رینڈوک ہاکی کلب کے خلاف پہلا پریکٹس میچ کھیلا اور شاندار کارکردگی کا مظاہرہ کرتے ہوئے 0-6 سے کامیابی حاصل کی۔ پاکستان کی جانب سے نوید عالم اور خیر اللہ نے 2,2 مرتبہ گیند کو جال میں پہنچایا جب کہ عبداللہ بابر اور غضنفر علی نے ایک ایک گول کیا۔قومی ٹیم 29 اپریل تک آسٹریلیا کی نیشنل انڈر 28 چیمپئن شپ میں شرکت کررہی ہے اور آسٹریلیا میں چار ماہ قیام کے دوران کھلاڑی مختلف کلبز کی جانب سے ٹریننگ پروگرامز اور میچز میں حصہ لیں گے۔
