لندن(خصوصی رپورٹ)دنیا بھر میں ایسے عجیب وغریب سکول مشہور ہیں جو یا تو اپنے محلِ وقوع یا پھر اپنی درس و تدریس کی وجہ سے مشہور ہیں۔ آیئے باری باری ان کا جائزہ لیتے ہیں۔ڈائن سکول۔امریکی شہر سیلم غیرمعمولی واقعات اور آسیب کی وجہ سے مشہور ہے۔ یہاں ایک ڈائن (وِچ) سکول ہے یہ ایک چھوٹا سا سکول ہے۔ اس کا آغاز یکم اپریل 2009 ءمیں کیا گیا تھا اور اسے شکاگو سے میساچیوسیٹس کے علاقے سیلم میں منتقل کیا گیا تھا۔یہاں جادو، جادوئی تحریروں اور آسیب وغیرہ کے کورس پڑھائے جاتے ہیں اور ان کی آن لائن تدریس بھی کی جاتی ہے۔ اب تک یہاں سے ڈھائی لاکھ افراد گریجویشن کرچکے ہیں۔بروکلِن فری سکول۔یہ سکول بھی امریکہ میں واقع ہے۔ سکول میں بچوں کو دو درجوں میں تقسیم کیا گیا ہے۔ اول اپرکلاس کے بچے جن کی عمر 11 سے 18 برس ہے اور دوم لوئر کلاس کے بچے جن کی عمریں 4 سے 11 برس تک ہوتی ہیں۔تمام بچوں کو یہ حق حاصل ہے کہ وہ جس طرح چاہیں علم حاصل کریں اور کسی بھی دوسری جماعت میں جاکر جتنا وقت گزارنا چاہیں تو اس کی بھی اجازت ہے۔

لندن (نیٹ نیوز) ٹی وی، کمپیوٹر، موبائل فون اور سوشل میڈیا نے جہاں لوگوں کو بہت سی آسانیاں فراہم کی ہیں ، وہیں کچھ مسائل بھی پیدا کیے ہیں ۔ خاص طور پر بچے جسمانی سرگرمیوں سے دور ہوتے جارہے ہیں جس کی وجہ سے ان میں موٹاپے سمیت صحت کے دیگر مسائل جنم لے رہے ہیں۔ بچوں اور نوجوانوں میں موٹاپے کے مسائل کس قدر سنگین ہیں؟ یہ اندازہ اس تحقیق سے لگایا جاسکتا ہے جس کے مطابق موٹے بچوں اور نوجوانوں کے دل کی شریانوں میں خون کی روانی میں اتنی ہی رکاوٹ ہوتی ہے جتنی 45 سال کی عمر کے کسی آدمی میں ہوتی ہے۔ طبی ماہرین کا کہنا ہے کہ بڑی عمر کے افراد کو صرف اپنے دل کی صحت کا خیال نہیں رکھنا چاہیے بلکہ بچوں پر بھی اتنی ہی توجہ دینی چاہیے۔ طبی ماہرین کا مشورہ ہے کہ والدین اپنے بچوں کے ساتھ زیادہ سے زیادہ جسمانی سرگرمیوں میں حصہ لیں تو پوری فیملی فٹ اور صحت مند رہ سکتی ہے۔

لاہور(نیٹ نیوز)برطانوی سماجی تنظیم کے تحت دنیا کے کئی ممالک میں رنگوں کی پسندیدگی پر سروے کیا گیا جن میں برطانیہ، جرمنی، امریکہ، آسٹریلیا، چین، ہانگ کانگ، سنگاپور، تھائی لینڈ اور انڈونیشیا شامل ہیں۔ سروے نتائج کے مطابق برطانیہ میں نیلے رنگ کو پسندیدہ قرار دینے والے لوگوں کی تعداد دنیا میں سب سے زیادہ ہے جہاں 33 فیصد لوگوں کا پسندیدہ ترین رنگ نیلا ہے جبکہ دنیا کے دیگر ممالک میں بھی نیلے رنگ کو پہلا انتخاب قرار دیا گیا۔سروے کے مطابق نیلے رنگ کو پسند کرنے کا تناسب مردوں اور عورتوں میں مختلف ہے ، امریکہ اور برطانیہ میں 40 فیصد مرد جب کہ 27 فیصد خواتین نیلے رنگ کو پسندیدہ قرار دیتے ہیں۔ماہرین نفسیات کا کہنا تھا کہ نیلا رنگ اخلاص،اعتماد اور امن کی علامت ہے اس لیے لوگ اسے زیادہ پسند کرتے ہیں ۔

ٹوکیو (نیٹ نیوز) ماہرین کا کہنا ہے کہ سبز چائے پینے والے عمر رسیدہ افراد اپنے ہم عمر افراد کے مقابلے میں زیادہ چست ہوتے ہیں۔ جاپان میں کی جانیوالی ایک تحقیق کے مطابق سبز چائے میں ایک ایسا جز موجود ہوتا ہے جو منہ کے کینسر کا سبب بننے والے خلیات کا خاتمہ کرتا ہے۔ اس میں ایسے اجزاءبھی موجود ہوتے ہیں جو مدافعتی نظام کے اہم سیلز کوضائع ہونے سے بچاتے ہیں۔

اوٹاوا (خصوصی رپورٹ) سوشل میڈیا کے عروج کے ساتھ سیلفی کا جنون بھی نئی نسل کے سرچڑھ چکا ہے ۔ آج جسے دیکھیں ہمہ وقت سیلفیاں بنا کر سوشل میڈیا پر پوسٹ کرنے میں مصروف نظر آتا ہے لیکن کیا کبھی آپ نے غور کیا کہ لڑکیاں اکثر موبائل فون چہرے کے اوپر کی طرف اٹھا کر سیلفی لیتی ہیں جبکہ لڑکے بالکل قدرے نیچے سے ؟اب کینیڈا کے سائنسدانوں نے لڑکے اور لڑکیوں کی سیلفی لینے کے انداز میں اس فرق کی وضاحت کر دی ہے ۔ رپورٹ کے مطابق سائنسدانوں کا کہنا ہے کہ لڑکے نیچے سے (پیٹ کے سامنے موبائل فون رکھتے ہوئے) اس لیے سیلفی لیتے ہیں کیونکہ اس طرح سیلفی میں وہ درازقد اور طاقتور معلوم ہوتے ہیں۔ اس کے برعکس لڑکیاں سر کے اوپر سے اس لیے سیلفی لیتی ہیں کیونکہ وہ چہرے کے تمام عوارض کو واضح طور پر دکھانا چاہتی ہیں اوراپنا موٹاپا چھپانا چاہتی ہیں۔ سائنسدانوں نے اپنی اس تحقیق میں ڈیٹنگ ایپلی کیشن ٹنڈر کے 900سے زائد صارفین کی سیلفیز کا تجزیہ کرکے یہ نتائج مرتب کیے ہیں۔ تحقیقاتی ٹیم کی سربراہ ڈاکٹر جینی مک کارٹنے کا کہنا تھا ہم نے جتنے لوگوں کا ڈیٹا حاصل کیا ان میں 40فیصد لڑکے نیچے سے اوپر کی طرف سے سیلفی لیتے تھے ۔ لڑکیوں میں اس طرح سیلفی لینے کی شرح صرف 16فیصد تھی، اس کے برعکس 25فیصد لڑکیاں اوپر کی طرف سے سیلفی لیتی تھیں اور اس انداز سے سیلفی لینے والے لڑکوں کی شرح بھی صرف16فیصد تھی۔ جتنے صارفین کا ڈیٹا ہم نے حاصل کیا ان میں سے تقریبا آدھے چہرے کے سامنے سے سیلفی لیتے تھے ۔

لندن (نیٹ نیوز) ایک نئے سروے سے معلوم ہوا ہے کہ روزانہ ایک نارنجی کھانے سے ڈیمنشیا کے حملے کا خطرہ 25 فیصد تک کم کیا جا سکتا ہے۔ واضح رہے کہ ڈیمنشیا بہت سے دماغی عارضوں کا مجموعہ ہے جس میں سوچنے سمجھنے کی صلاحیت اور یادداشت تیزی سے متاثر ہوتی ہے۔ اس کے علاوہ انگور یا سبز لیموں کھانے سے بھی یکساں فائدہ ہوتا ہے کیونکہ ان سب میں دماغ کی حفاظت کرنیوالا مرکب موجود ہوتا ہے۔ جاپانی ماہرین نے کہا ہے کہ روزانہ نارنجی کھانے سے ڈیمنشیا اور الزائمر کا خطرہ کم ہوجاتا ہے کیونکہ ان پھلوں میں ایک مرکب نوبیلیٹن پایا جاتا ہے۔ اسی طرح حال ہی میں برٹش جرنل آف نیوٹریشن میں بھی اسی سے وابستہ ایک رپورٹ شائع کی گئی ہے۔ اس میں بوڑھے اور درمیانی عمر کے 13000 افراد کا کئی برس تک جائزہ لیا گیا ہے۔ ان میں سے جن افراد نے انگور، نارنجی اور لیموں وغیرہ کا روزانہ استعمال کیا ان میں ڈیمنشیا اور دیگر ذہنی بیماریوں کا خطرہ 23 فیصد تک کم نوٹ کیا گیا۔