کلثوم نواز کی غیر موجودگی میں انتخابی مہم چلانے والی شخصیت کا نام سامنے آگیا

لاہور (مانیٹرنگ ڈیسک) این اے 120 ضمنی الیکشن 17ستمبر کو ہونے جارہا ہے جس میں تقریبا ایک ماہ کا وقت رہ گیاہے اور ایسی صورتحال میں برطانوی ڈاکٹرز نے کلثوم نواز کے گلے میں کینسر کی تشخیص کی ہے تاہم ایسی صورتحال میں ان کی بیٹی مریم نواز شریف اپنی والدہ کی انتخابی مہم کو بھر پور انداز میں چلائیں گی ۔نجی ٹی وی چینل کے مطابق کلثوم نواز ابتدائی طور پر انتخابی مہم میں حصہ نہیں لے پائیں گی اور اس صورتحال میں مریم نواز ان کی الیکشن مہم کو زور شور سے آگے بڑھائیں گی ،مریم نواز نے ماضی میں اپنے والد نواز شریف کی بھی انتخابی مہم چلائی تھی ۔ واضح رہے کہ اس سے قبل اتفاق رائے سے فیصلہ کیا گیا تھا کہ بیگم کلثوم نواز کی انتخابی مہم میں پرویز ملک اور حمزہ شہباز نے خدمات انجام دینی تھی لیکن اب کلثوم نواز کے خاندانی ذرائع سے معلوم ہواہے کہ یہ فرائض مریم نواز انجام دیں گی