ممبئی (خصوصی رپورٹ) خواتین کو جنسی ہراساں کرنے کے واقعات صرف ہالی وڈ انڈسٹری تک کی محدود نہیں بلکہ بالی وڈ انڈسٹری میں بھی بہت سی خواتین اس کا نشانہ بن چکی ہیں۔ اداکار عرفان خان اور ریچا چڈا ان ناخوشگوار واقعات کے خلاف دن بدن زیادہ سے زیادہ آواز اٹھا رہے ہیں اور اب ودبالن بھی اس مسئلے کے خلاف بات کرتی نظر آ رہی ہیں۔ اداکارہ ودیابالن اپنی فلم ”تمہاری سلو“ کی پروموشنز کے دوران خواتین کو جنسی ہراساں کرنے کے خلاف کافی بات کر رہی ہیں۔ ودیابالن کے مطابق مثبت بات یہ ہے کہ زیادہ سے زیادہ خواتین اپنے تجربے شیئر کر رہی ہیں اور دوسری خواتین کی بھی حوصلہ افزائی کر رہی ہیں۔ اداکارہ کا کہنا تھا کہ جن لوگوں کو جنسی ہراساں کیا جاتا ہے‘ صرف وہی جانتے ہیں کہ ایسی صورتحال میں کیسا محسوس ہوتا ہے۔ اگر کوئی آپ کو ہاتھ لگائے تو کتنا عجیب لگتا ہے۔ مجھے بھی بے حد غصہ آتا ہے۔ خیال رہے کہ حال ہی میں بالی وڈ فلم پروڈیوسر ہاروی وائنسٹن کے خلاف تقریباً 18اداکاراﺅں و خواتین نے جنسی طور پر ہراساں کرنے کا الزام عائد کیا تھا جس کے بعد سے خواتین نے سوشل میڈیا پر ”می ٹو“ نامی مہم کاآغاز بھی کر دیا تھا۔ اس حوالے سے ودیابالن نے مزید کہا ہے کہ مجھے خوشی ہے کہ خواتین جنسی ہراساں ہونے کے خلاف آواز اٹھا رہی ہیں کیونکہ اس میں ان کی کوئی غلطی نہیں۔ ہمیں ان کا نام لینا چاہئے اور انہیں شرمندہ کرنا چاہئے جو دوسروں کو جنسی طور پر ہراساں کر رہے ہیں۔
