لاہور (خصوصی رپورٹ) پنجاب کے وزیر اطلاعات و ثقافت فیاض الحسن چوہان نے نجی ٹی وی کے پروگرام میں بدزبانی پر معافی مانگ لی۔ فیاض الحسن چوہان نے گزشتہ روز نجی ٹی وی کے پروگرام میں شرکت کی۔ میزبان نے ان کی پرانی ویڈیوز آن ایئر نشر کیں جس میں وہ شیخ رشید اور شریف خاندان پر تنقید اور نازیبا زبان استعمال کررہے تھے۔ اس پر صوبائی وزیر اطلاعات سیخ پا ہوگئے اور نہ صرف چینل کو گھٹیا کہا بلکہ مائیک پٹخ کر گالیاں بھی دیں۔ اس کے ساتھ ہی انہوں نے اپنے مخالفین کے بارے میں بھی ایک بار پھر نازیبا الفاظ استعمال کیے۔ فیاض الحسن چوہان کو اس رویے پر سوشل میڈیا پر شدید تنقید کا نشانہ بنایا گیا جس پر انہوں نے معذرت کی ہے۔ ٹوئٹر پر اپنے پیغام میں صوبائی وزیر اطلاعات نے کہا کہ آف دی کیمرہ کلپ چلانا صحافت کی اخلاقیات کے خلاف ہے، پورے پروگرام میں تحمل کے ساتھ انتہائی منفی سوالات کے جواب دیئے ، پروگرام ختم ہونے کے بعد آف کیمرہ میرے متعلق کلپ چلایا گیا، اس کے باوجود میں معذرت خواہ ہوں۔

لاہور (سٹاف رپورٹر) صدارتی امیدوار مولانا فضل الرحمن کے کاغذات نامزدگی میں تضاد سامنے آگیا۔ مولانا فضل الرحمن خود کو مولانا کہلانا پسند نہیں کرتے۔ فضل الرحمن نے کاغذات نامزدگی میں اپنا نام مولانا فضل الرحمن لکھنے کے بعد لفظ مولانا کو ہاتھ سے کاٹ دیا۔ مولانا فضل الرحمن نے 2015ءمیں 10لاکھ 74ہزار 22روپے پر 49ہزار 908روپے انکم ٹیکس ادا کیا۔ کاغذات نامزدگی کے ہمراہ لف بیان حلفی اور ایف بی آر کے ریکارڈ کے مطابق مولانا فضل الرحمن نے 2016ءاور 2017ءمیں الگ الگ انکم ٹیکس بیان کیا۔ مولانا فضل الرحمن نے 2016ءمیں بیان حلفی کے مطابق 11لاکھ 6ہزار 808روپے آمدن پر 50ہزار 181روپے انکم ٹیکس ادا کیا‘ تاہم ایف بی آر کے ریکارڈ کے مطابق مولانا فضل الرحمن نے 2016ءمیں 11لاکھ 6ہزار 808روپے آمدن پر 64ہزار 92روپے ٹیکس ادا کیا۔ بیان حلفی کے مطابق مولانا فضل الرحمن نے 2017ءمیں 17لاکھ 21ہزار 499روپے آمدن پر ایک لاکھ 25ہزار 225روپے ٹیکس ادا کیا‘ تاہم ایف بی آر کے ریکارڈ کے مطابق مولانا فضل الرحمن نے 2017ءمیں 17لاکھ 21ہزار 499روپے آمدن پر ایک لاکھ 38ہزار 274روپے ٹیکس ادا کیا۔ بیان حلفی میں مولانا فضل الرحمن کے اثاثہ جات میں ایک سال کے دوران 12لاکھ 81ہزار 424روپے کا اضافہ ہوا۔ اضافہ کیسے ہوا ‘بیان نہیں کیا گیا۔ مولانا فضل الرحمن کی تعلیم میٹرک اور شہادةالعالمیہ کی ڈگری ہے۔

لاہور(خصوصی رپورٹ)وزیر اعلیٰ سردار عثمان احمد بزدار نے بتایا کہ ان کی فیملی وزیر اعلیٰ ہاﺅس چھوڑ کر واپس آبائی گھر چلی گئی ہے اور ان کی بیٹیاں آبائی گھر خوش ہیں۔ انہوں نے اپنی اہلیہ کو ہدایت کی ہے کہ وہ ڈیرہ غازی خان کالج میں لاہور آمد کی باقاعدہ درخواست رخصت جمع کرائیں۔انہوں نے اس امر کا انکشاف صحافیوں کے ساتھ ایک ملاقات میں کیا۔عثمان بزدار نے کہا کہ جنوبی پنجاب کی ترقی کے لئے ذہن میں بہت کچھ ہے اور جنوبی پنجاب کی ترقی کے لئے بہت خواب دیکھے تھے جن کی تعبیر کا وقت آگیا ہے ، جنوبی اور وسطی پنجاب کو مساوی ترقی دیں گے ، وزیر اطلاعات و ثقافت فیاض الحسن چوہان کے متعلق سوالوں کو وزیر اعلیٰ نے ٹال دیا اور کہا کہ وقت کے ساتھ سب خامیاں دور ہو جائیں گی۔ وزیر اعلیٰ نے اپنی دوکمروں پر مشتمل رہائش بھی دکھائی اور کہا کہ سادہ زندگی کی وجہ سے تمام صوابدیدی اختیار سے دستبردار ہو گئے ہیں ۔

کراچی (ویب ڈیسک )کراچی کے مختلف علاقوں میں ہلکی بارش سے موسم خوشگوار اور سہانا ہوگیا ہے۔آج صبح سویرے سے ہی کراچی کے علاقے ملیر، شیر شاہ، لسبیلہ، گلشن اور گلستان جوہر کے مختلف علاقوں میں ہلکی بارش کا سلسلہ جاری ہے جس سے موسم خوشگوار اور سہانا ہوگیا ہے۔صدر، ایم اے جناح روڈ، آئی آئی چندریگر روڈ، لیاقت آباد، ایف بی ایریا، پی ای سی ایچ ایس، یونیورسٹی روڈ، جیل روڈ، جہانگیر روڈ، ناظم آباد، قائد آباد، شاہ فیصل کالونی اور لانڈھی کے علاقوں میں بھی ہلکی بارش ہوئی۔ہلکی بارش کے باعث سڑکوں پر پھسلن کے نتیجے میں متعدد موٹرسائیکل سواروں کے گرنے کے واقعات بھی پیش آئے، شہر کی مصروف ترین شاہراہ شارع فیصل پر بھی موٹرسائیکلوں کے پھسلنے کے واقعات رپورٹ ہوئے۔محکمہ موسمیات کے مطابق آئندہ 24 گھنٹوں کے دوران شہر میں مطلع ابر آلود رہنے کا امکان ہے اور مختلف علاقوں میں مزید بوندا باندی کی بھی پیشگوئی ہے۔محکمہ موسمیات نے بتایا کہ ہوا میں نمی کا تناسب 74 فیصد ہے جب کہ سمندری ہوائیں 18 کلو میٹر فی گھنٹا کی رفتار سے چل رہیں ہیں۔محمکہ موسمیات کا کہنا ہے کہ شہر کا زیادہ سے زیادہ درجہ حرارت 34 ڈگری سینٹی گریڈ تک رہنےکا امکان ہے۔محکمہ موسمیات کے مطابق آج اسلام آباد سمیت راولپنڈی، گوجرانوالہ، مالاکنڈ، کشمیر اور گلگت بلتستان میں کہیں کہیں بارش کی توقع ہے جب کہ ملک کے بیشتر علاقوں میں موسم گرم اور مرطوب رہنے کا امکان ہے۔

اسلام آباد( ویب ڈیسک )وزارت خارجہ کی جانب سے سینیٹ میں یہ بات بتائی گئی ہے کہ مشرق وسطیٰ کے ممالک کی مختلف جیلوں میں ہزاروں پاکستانی قید ہیں۔وفاقی وزیر خارجہ شاہ محمود قریشی نے سینیٹر محسن عزیز کے سوال کا جواب دیتے ہوئے بتایا کہ تقریباً 594 پاکستانی اب تک بھارت کی مختلف جیل میں قید ہیں۔انہوں نے بتایا کہ گزشتہ 5 برسوں میں بھارت نے 420 کے قریب پاکستانی قیدی رہا کیے اور اسی عرصے میں پاکستان نے تقریباً 1997 بھارتی قیدیوں کو رہا کیا جبکہ اس وقت 471 بھارتی پاکستانی جیلوں میں قید ہیں۔اجلاس کے دوران سینیٹر بہرامند خان تنگی کی جانب سے پوچھے گئے سوال کا جواب دیتے ہوئے وزیر خارجہ نے کہا کہ 18-2017 کے درمیان خلیجی ممالک میں 6 ہزار 4 سو 50 پاکستانیوں کو جیل ہوئی۔انہوں نے بتایا کہ ایک اندازے کے مطابق 2 ہزار 9 سو 70 پاکستانی، سعودی عرب، 2 ہزار 6 سو پاکستانی، متحدہ عرب امارات، 6 سو 57 اومان، ایک سو 28 بحرین، 54 قطر، 38 کویت جبکہ 3 یمن کی جیلوں میں قید ہیں۔تاہم ان ممالک میں مشن کی ٹیموں کے دورے، قید پاکستانیوں تک رسائی اور ان کے اہل خانہ سے مسلسل رابطہ قائم کرنے سے متعلق شاہ محمود قریشی کا کہنا تھا کہ قیدیوں کی صحت، خوراک اور قانونی معاونت سے متعلق مشنز متعلقہ جیل انتظامیہ سے مسلسل رابطے میں رہتا ہے۔

لاہور( ویب ڈیسک ) بھارت نے اپنے 2 آبی منصوبوں، 1000 میگا واٹ پکوال دل اور 48 میگا واٹ لوئر کلنال کا جائزہ لینے کے لیے پاکستانی ماہرین کے دورے پر رضا مندی کا اظہار کردیا۔ اس کے علاوہ پاکستان کو یقین دہانی کروائی گئی کہ دونوں منصوبوں پر اس کے اعتراضات کو سنجیدہ لیتے ہوئے تکنیکی سمجھوتوں کی روشنی میں حل کیا جائے گا جو آئندہ اجلاس میں طے کیے جائیں گے۔اس حوالے سے آبی ذخائر کے سیکریٹری شمائل احمد خواجہ نے ڈان کو بتایا کہ لاہور میں ہونے والے ان 2 روزہ مذاکرات میں سب سے اہم پیش رفت یہ ہے کہ بھارت پاکستانی ماہرین کو اپنے منصوبوں کا دورہ کروانے پر رضامند ہوگیا۔جس کے بعد پاکستانی ماہرین پر مشتمل وفد آئندہ ماہ کے اختتام پر بھارت کا دورہ کرے گا، اس دوران ہمارے ماہرین سندھ طاس معاہدے کے تحت دونوں منصوبوں کا باریک بینی سے معائنہ کریں گے۔جس کے بعد پاکستان بھارت سے دریائے چناب پر بنائے گئے ان دونوں منصوبوں کے حوالے سے اپنے اعتراضات پیش کرے گا۔ان کا کہنا تھا کہ ہم سمجھتے ہیں کہ اپنے اعتراضات دور کرنے کے لیے ہم بھارت کو قائل کرنے میں کامیاب ہوگئے ہیں کیوں کہ ہم سندھ طاس معاہدے کے تحت اپنے دریاو¿ں کی روانی میں کسی قسم کی رکاوٹ نہیں دیکھنا چاہتے۔جس کے باعث بھارت ہمارے اعتراضات پر نظر ثانی کرنے کے لیے تیار ہوگیا اور 2 روزہ مذاکرات کے اختتام پر فیصلہ کیا گیا کہ دونوں ممالک علیحدہ علیحدہ تکنیکی یادداشت تیار کریں گے اور آئندہ 3 ماہ میں متوقع اجلاس میں ان کا تبادلہ کیا جائے گا۔سیکریٹری آبی ذخائر شمائل احمد خواجہ نے دعویٰ کیا کہ دونوں ممالک کے درمیان بھارت میں ہونے والے مذاکرات کا اگلا دور پاکستان کے خدشات کے بارے میں بات چیت کے سلسلے میں حتمی اور جامع ہوگا۔ان کا مزید کہنا تھا کہ ہمیں امید ہے کہ آئندہ اجلاس میں بھارت ہمارے اعتراضات پر غور کرے گا اور سندھ طاس معاہدے کا احترام کرتے ہوئے انہیں حل کیا جائے گا۔

لاہور(کرائم رپورٹر)ڈی پی او پاکپتن کی تبدیلی کا معاملہ، کہانی کا پوشیدہ پہلو منظر عام پر آگیا۔ سی ایم ہا¶س نے آئی جی سے پہلے ہی ڈی پی او رضوان گوندل کو تبدیل رنے کا فیصلہ کر لیا تھا۔ ڈی پی او رضوان گوندل کی کہانی کا ایک نیا رخ سامنے آگیا۔ ذرائع کے مطابق پولیس اہلکاروں کی جانب سے خاتون اول کی بیٹی کے ساتھ بدتمیزی کی گئی، پولیس اہلکار نے خاتون اول کی بیٹی کا ہاتھ پکڑاتھا، خاور مانیکا کی بیٹی نے بدتمیزی کی شکایت والدہ سے کی تھی جبکہ بدتمیزی کے بارے میں مانیکا فیملی نے ڈی پی او کو بھی آگاہ کیا تھا، چند روز بعد ہی خاور مانیکا کو ناکے پر روک لیا گیا۔مانیکا فیملی سے ہونیوالی بدتمیزی کے بعد سی ایم ہا¶س نے مداخلت کی، سی ایم ہا¶س نے آئی جی دفتر سے پہلے ہی ڈی پی او رضوان گوندل کو تبدیل کرنے کا فیصلہ کرلیا تھا۔ ڈی آئی جی ہیڈ کوارٹرز کی فون کال سے بھی پہلے وزیر اعلیٰ کا پرسنل سیکرٹری ڈی پی او پاکپتن سے چارج چھوڑنے کے متعلق آگاہی لیتا رہا جبکہ ڈی آئی جی ہیڈ کوارٹرز نے سی ایم کے پرسنل سیکرٹری کے فون سے بیس منٹ بعد رضوان گوندل کو چارج چھوڑنے کے احکامات دیئے۔ذرائع کے مطابق سی ایم ہا¶س میں ڈی پی او کو ملازمین کے ساتھ ڈیرے پر جانے کا کہا گیا تھا۔

کراچی (این این آئی) وفاقی وزیر ریلوے شیخ رشید نے کہا ہے کہ ریلوے کی زمین ملک کا قرضہ اتارسکتی ہے عمران خان اس کو فروخت کرنے کا فیصلہ کریں۔ نیب میں آج بھی لاتعداد مقدمات ہیں، 8 آخری مرحلے (فائنل اسٹیج)میں ہیں۔جو انکوائری نیب مانگ رہا ہے وہ اسے دے رہے ہیں۔42 ارب کا خسارہ جلد پورا کیا جائیگا، ریلوے سر مایہ کاروں کے لئے حاضر ہے ۔ریلوے میں مسافروں کانہیں اصل مسئلہ فریٹ کا ہے۔افسران سن لیں فریٹ کے حوالے سے بہت شکایات ہیں مجھے فریٹ میں 100 فیصد اضافہ چاہیے۔ ریلوے کی بہتری کے لئے بین الاقوامی ماہر آرہے ہیں وہ بلامعاوضہ اپنی خدمات فراہم کریں گے۔ ریلوے 20 کروڑ عوام کی سوار ی ہے ،قوم 4سے5ماہ کی مہلت دے ریلوے کاسسٹم ٹھیک کروں گا۔ریلوے ٹریک کو کرائے پر بھی دینے کے لئے تیار ہیں ۔ ان خیالات کا اظہار انہوں نے جمعرات کو کینٹ اسٹیشن پر پریس کانفرنس کرتے ہوئے کیا۔ قبل ازیں شیخ رشید احمد کی صدارت میں سٹی اسٹیشن پر ریلوے افسران کا اجلاس منعقد ہوا۔ جس میں کراچی سے چلنے والی ٹرینوں بلخصوص مال گاڑیوں اور فریٹ کا جائزہ لیا گیا۔بعد ازاں کینٹ اسٹیشن پر صحافیوں سے گفتگو کرتے ہوئےشیخ رشید احمد نے کہا کہ ریلوے 20کروڑعوام کی سواری ہے، قوم چار سے پانچ ماہ کی مہلت دے ریلوے کاسسٹم ٹھیک کروں گا۔مال گاڑیوں میں 100 فیصداضافہ کرناچاہتے ہیں،ریلوے میں مسافروں کانہیں اصل مسئلہ فریٹ کا ہے۔ انہوں نے کہا کہ ریلوے کو 20کروڑ عوام کی سواری بنانا چاہتے ہیں، 65سال کے شہریوںکو 50 فیصد اور 75 سال کے افراد کے لئے ریلوے کاسفر مفت ہوگا اور معذور افراد کے لئے 25 فیصد رعایت دی جائے گی۔انہوں نے کہا کہ60 دنوں میں پی ٹی آئی اور عمران خان کے متحرک ورز اور بیرون ملک سے ماہر آئیں گئے، وہ ریلوے کی بہتری کے لئے کام کریں گے ۔وہ بلا معاوضہ میں اپنی خدمات دے رہے ہیں ہم صرف ان کی ہوٹلوں میں رہائش کا بندو بست کر رہے ہیں۔انہوں نے کہا کہ آن لائن بکنگ اورٹریڈکی بہتری کیلیے موبائل ایپلی کیشن7دن میں بن جائیگا۔ہر شخص اپنے موبائل پر ٹرین کی معلومات حاصل کر سکتا ہے کہ اس کی ٹرین کہاں ہے ۔انہوں نے کہا کہ افسران سن لیں،فریٹ کے حوالے سے بہت سی شکایات ہیں، فریٹ کی بہتری کے لئے تمام کو ملکر کام کرنا ہوگا۔ فریٹ کی بہتری کے لئے نجی کمپنیوں کو بھی شامل کریں گے۔فریٹ کے اندر بڑی کرپشن ہے 25 فیصد فریٹ چاہیے میں افسران کو ایک مہلت دے کر جارہا ہوں۔انہوں نے کہا کہ کراچی کے لوگوں سے وعدہ کرتا ہوں کے سی آرمیں رکاوٹ نہیں بنیں گے،ہرصورت ریلوے کاخسارہ کم کریں گے، کراچی سر کلر ریلوے (کے سی آر)پروزیر اعلی سندھ سید مراد علی شاہ اور متحدہ قومی موومنٹ پاکستان( ایم کیو ایم) سے بات کریں گے۔کراچی میں سرکلر ریلوے کے بغیر سفر ی سہولیات میسر نہیں ہونگی کراچی سے جلد نان سٹاپ ریلوے ٹرین ( گرین لائن کی طرز کی) چلائی جائیگی سفری سہولت کے لئے جلد 4 نئی ٹرینیں چلائی جائینگی۔ابھی ٹرینوں کے نام فائنل نہیں کئے ہیں ،15ستمبر کو دو نئی ٹرینیں چلا ئیں گے۔شیخ رشید نے کہا کہ ملک کا قر ض اتارنے کے لئے ریلوے کی زمین ہی کافی ہے۔ ہم اس کو کابینہ میں لیکر جا ئیں گے،وزیراعظم چاہیں تو ریلوے کی زمیں فروخت کردیں ریلوے کا گند صاف کرنے کے لئے چار ماہ کی مہلت دی جائے کرپشن میں ملوث کسی ملازم کو سپورٹ نہیں کرینگے 100 دن میں وزیراعظم کے خواب کی تکمیل کو پورا کرینگے ۔انہوں نے کہا کہ لاکھوں ایکڑ کی ہماری زمینیں ہیں۔ ہم بزنس مال اور فوڈمارکیٹ بنانے چاہتے ہیں۔ہم پاگل نہیں ہیں ریلوے کی ملکیت کسی کو نہیں دیں گے۔انہوں نے کہا کہ10 ہزارہاو سز ہیں ، ریلوے کی زمین پر کراچی میں سب سے زیادہ ہاو سز بن سکتے ہیں، کے الیکڑک بھی کالونی کو میٹر لگانے کے لئے تیار ہو گی ہے۔ انہوں نے کہا کہ 42 ارب کا خسارہ جلد پورا کیا جائیگا سر مایہ کاروں ( انوسٹر)کے لئے ریلوے اور اس کے ہسپتال حاضر ہے جو چاہتا آئے پیسے لگائے اور چلائے ۔ہم تمام اسپتال پرائیویٹ پارٹنر شپ دینا چاہتے ہیں ،ریلوے میںکوئی بھی کام بغیرمیرٹ اورٹینڈرکے کوئی چیزنہیں ہوگی۔زیرو کرپشن ہوگی۔انہوں نے کہا کہ گوجر خان سے جہلم تک ایک لائن 56 کولیمٹر ہے اس کو 20کلومیٹر کرسکتے ہیں ۔ بہت سے ریلوے ٹریک خالی پڑے ہیں جن کو چلانا چاہتے ہیں لیکن ہم ٹریک کرائے پر بھی دینے کا تیار ہیں ۔بہت سے ٹریک سی پیک میں بھی شامل ہیں جو اس میں دیکھ لیں گے ۔ انہوں نے کہا کہ چاہتا ہوں مزدور،ڈرائیور اور کنڈیکٹرز کے اسکیل میں بھی اضافہ ہو۔ملازمین کوبھی خوشحال کریںگے اورریلوے کوبھی خسارے سے نکالیں گے۔انہوں نے کہا کہ نوکریاں بھی دیں گے ریلوے میں ابھی بھی 20 ہزار لوگوں کی گنجائش ہے۔کسی غریب یاکچی آبادی کوابھی بیدخل نہیں کریں گے ۔انہوں نے کہا کہ نیب میں آج بھی لاتعداد کیسز ہیں 8 آخری مرحلے(فائنل اسٹیج) میں ہیں ۔ میراکام تحقیقات کرنا نہیں ہے، نیب کا کام ہے ، جو بھی کرپشن ہوئی نیب اس کو دیکھے، جو انکوائری نیب مانگ رہا ہے وہ اسے دے رہے ہیں۔ انہوں نے کہاکہ ریلوے پولیس کی تنخواہ بڑھانے کے ساتھ یہ بھی دیکھیں گے کہ ان کی ضرورت ہے یا نہیں۔

]