غیرملکی کوچ کے بغیرپرفارمنس بہترنہیں ہوسکتی،رضوان

لاہور(سپورٹس رپورٹر ) قومی ہاکی ٹیم کے کپتان رضوان سینئر ٹیم انتظامیہ کی جانب سے ناقص کارکردگی کا قصوروار سنیئر کھلاڑیوں کو ٹھہرانے پر پھٹ پڑے اور انہوں نے غیرملکی کوچ کی تقرری کو کارکردگی میں بہتری لانے کا واحد حل قرار دے دیا۔میڈیا سے بات کرتے ہوئے رضوان سینئر کا کہنا تھا کہ قومی کھیل کو اپنے پاو¿ں پر کھڑا کرنے کےلیے فیڈریشن سمیت ہر شعبے میں پروفیشنل لوگوں کو آگے لانا ہوگا، ملکی کوچز کے ساتھ جان چھڑانے والی پالیسی سے ٹیم کی پرفارمنس کبھی بہتر نہیں ہوسکتی۔رضوان نے کہا کہ ٹیم منتخب کرتے وقت کپتان سے کوئی رائے نہیں لی جاتی، ورلڈ کپ کے لیے منتخب کردہ اسکواڈ میں مجھ سے کوئی مشاورت نہیں ہوئی، المیہ یہ ہے کہ ناکامی کا ملبہ ہمیشہ سینئرز کھلاڑیوں پر ڈال دیا جاتا ہے، اس بار بھی کوچز اپنی ذمہ داری قبول کرنے کی بجائے ایسا کررہے ہیں جو کھلاڑیوں کے ساتھ بہت زیادتی ہے۔کپتان نے کہا کہ دوسرے ممالک کی طرح ہمیں بھی ورلڈکپ سے ورلڈ کپ تک غیر ملکی کوچز کی تقرری کرنا ہوگی، ہالینڈ کا کوچ چھ سال سے ٹیم کے ساتھ کام کررہا ہے، غیرملکی کوچز کبھی کھلاڑیوں کو برا نہیں کہتے، بلکہ اپنی گیم پلان میں تبدیلی کرکے اچھے نتائج لیتے ہیں، ہمارے ہاں کھلاڑیوں کو ہی ہار کا ذمہ دار ٹھہرایا جاتا ہے۔