اسلام آباد(ویب ڈیسک) تحریک انصاف کے رکن اسمبلی سیف الرحمان نے قومی اسمبلی میں سابق ایس ایس پی راﺅ انوار کے اثاثوں اور کارروائیوں کی تحقیقات کیلئے مشترکہ تحقیقاتی ٹیم (جے آئی ٹی) بنانے کا مطالبہ کردیا۔سانحہ ساہیوال کے بعد ملک میں ایک بار پھر سابق ایس ایس پی راﺅ انوار کے نام کی گونج سنائی دے رہی ہے۔ وفاقی وزیر برائے انسانی حقوق شیریں مزاری نے گزشتہ روز ٹوئٹر پر اپنے بیان میں کہا تھا کہ راﺅ انوار سے سانحہ ساہیوال تک بطور حکومت ہمارا فرض ہے کہ جعلی مقابلوں کا خاتمہ کیا جائے۔ لیکن اب کراچی سے تحریک انصاف کے رکن قومی اسمبلی نے بھی راﺅ انوار کے اثاثوں اور کارروائیوں سے متعلق کمیٹی بنانے کا مطالبہ کیا ہے۔تحریک انصاف کے رکن سیف الرحمان نے قومی اسمبلی میں خطاب میں کہا کہ کراچی میں سابق ایس ایس پی راﺅ انوار نے 440 افراد کو ماورائے عدالت قتل کیا۔انہوں نے مطالبہ کیا کہ ایوان کے ذریعے ایک کمیٹی تشکیل دی جائے جو راﺅ انوار کے جرائم اور اثاثوں کی تحقیقات کرے۔ ان کا کہنا تھا کہ راﺅ انوار ایک سال میں 74 مرتبہ پاکستان سے بیرون ملک گیا اور واپس آیا۔کیا ایک ایس ایس پی اپنی تنخواہ سے اتنی بار ملک سے باہر آجا سکتا ہے؟ سیف الرحمان نے کہا کہ ’راﺅ انوار جیسے لوگ جب تک کسی کے بہادر بچے بنے رہیں گے، میرے بچوں اور نوجوانوں کا قاتل آپ کا ’بہادر بچہ ‘ بنا رہے گا اور آپ اس کو میڈلز اور توسیع دیتے رہیں گے اور اس کو ہتھکڑی نہیں لگائیں گے تو پھر محرومی پھیلے گی‘۔ یاد رہے کہ گزشتہ دنوں سپریم کورٹ آف پاکستان نے نقیب اللہ قتل کیس کے مرکزی ملزم سابق سینئر سپرنٹنڈنٹ پولیس (ایس ایس پی) راﺅ انوار کا نام ایگزٹ کنٹرول لسٹ (ای سی ایل) سے نکالنے کی درخواست مسترد کردی تھی۔
