مقبوضہ کشمیر: حریت راہنما یاسین ملک سمیت حریت راہنماﺅں کو گرفتار کر لیا

سری نگر (ویب ڈیسک ) مقبوضہ کشمیر کے شہر سرینگر میں حریت رہنما یاسین ملک کو گرفتار کر لیا گیا ہے. بھارتی سپریم کورٹ میں آرٹیکل 35اے کی سماعت متوقع ہے اس حوالے سے ممکنہ رد عمل سے بچنے کے لیے بھارت نے مقبوضہ کشمیر میں حریت راہنماﺅں اور کارکنوں کے خلاف کریک ڈاﺅن شروع کر دیا۔کشمیری میڈیا کے مطابق حریت رہنما یاسین ملک، امیرجماعت اسلامی عبد الحامد فیاض سمیت دیگر راہنماﺅں اور کارکنوں کو گرفتار کر لیا گیاہے‘حریت قیادت نے کہا ہے کہ مقبوضہ وادی کے عوام آرٹیکل 35 اے میں ردوبدل تسلیم نہیں کریں گے۔ میر واعظ عمر فاروق کا کہنا ہے کہ کشمیریوں کے خلاف بھارتی غیر آئینی، پر تشدد اقدامات سے زمینی حقائق نہیں بدلیں گے، طاقت اور دھمکیوں سے صورت حال صرف بگڑے گی ۔بھارتی سپریم کورٹ میں آرٹیکل 35 اے کی سماعت پیر کو متوقع ہے، بھارت نے اس موقع پر مقبوضہ وادی میں مزیدبھارتی پولیس اور نیم فوجی دستوں کی تعیناتی کا فیصلہ کیا ہے جبکہ پہلے سے تعینات پولیس اور نیم فوجی دستوں کو ہائی الرٹ کر دیا گیا ہے ۔ دوسری جانب حریت رہنما یاسین ملک کی اہلیہ مشعال ملک نے کہا ہے کہ بھارت کشمیر میں 70 سالوں سے ظلم و ستم کی انتہا کررہا ہے‘ ویڈیو پیغام میں مشعال ملک کا کہنا تھا کہ جنگی جنون میں مبتلا بھارت پاکستان کو دھمکیاں دے رہا ہے، مسئلہ کشمیر دو ایٹمی ممالک کے درمیان سلگتی چنگاری ہے۔