فٹ بال کی پروموشن کے لیے کاکا اور فیگو سمیت انٹرنیشنل فٹبالرز پاکستان پہنچ گئے

کراچی: (ویب ڈیسک)ریکارڈو کاکا اور لوئس فیگو سمیت کئی عالمی شہرت یافتہ فٹبال اسٹارز ایک مرتبہ پھر پاکستان پہنچ گئے۔پاکستان کا دورہ کرنے والے اسٹار انٹرنیشنل فٹبالرز نے اس خواہش کا اظہار کیا ہے کہ ملک میں فٹبال کا کھیل ترقی کرے اور نئے ٹیلنٹ کو اپنی صلاحیتوں کے اظہار کے بھرپور مواقع میسر آئیں۔برازیل کے ریکارڈو کاکا، پرتگال کے لوئس فیگو، اسپین کے کارلیس پیوئل اور فرانس کے نکولس انیلکا نے مقامی ہوٹل میں پریس کانفرنس کرتے ہوئے کہا کہ وہ پاکستان میں فٹ بال کی پروموشن کے لیے اپنے بھرپور تعاون کی یقین دہانی کراتے ہیں۔انہوں نے کہا کہ ہم پاکستان میں آ کر بہت خوش ہوئے ہیں اور یہ کہ پاکستان میں ٹیلنٹ کی کوئی کمی نہیں، ہماری کوشش یہ ہوگی کہ اپنے تجربے کو نوجوانوں میں منتقل کریں۔انہوں نے کہا کہ اس حوالے سے ان سے جو بھی ہو سکا وہ کریں گے۔پریس کانفرنس کے بعد انٹرنیشنل فٹبالرز نے مقامی شاپنگ مال میں اپنے مداحوں کے ساتھ وقت گزارا۔مذکورہ اسٹارز اتوار کو لاہور میں نمائشی میچ کھیلیں گے جو کہ نیشنل ہاکی اسٹیڈیم میں کھیلا جائے گا جب کہ انٹرنیشنل فٹبالرز اگلے مرحلے میں لاہور جائیں گے جہاں وہ گورنر پنجاب سے بھی ملاقات کریں گے۔