وزیراعظم نے قیمتیں برقرار رکھنے کی منظوری دی، اوگرا نے پٹرولیم مصنوعات کی قیمتوں میں کمی کی سمری بھیجی تھی
اسلام آباد (ویب ڈیسک ) حکومت نے آئندہ 15 رو زکیلئے پٹرولیم مصنوعات کی قیمتیں برقرار رکھنے کا فیصلہ کرلیا ہے، وزیراعظم نے قیمتیں برقرار رکھنے کی منظوری دے دی ہے، اوگرا نے پٹرولیم مصنوعات کی قیمتوں میں کمی کی سمری بھیجی تھی۔ تفصیلات کے مطابق حکومت نے پٹرولیم مصنوعات کی قیمتوں میں کمی کرنے کی بجائے پرانی قیمتیں برقرار رکھنے کا فیصلہ کرلیا ہے۔وزیراعظم عمران خان کی پٹرول اور ڈیزل کی قیمتیں برقرار رکھنے کی وزارت پٹرولیم اور وزارت خزانہ کو ہدایت کی تھی۔یاد رہے اوگرا کی ارسال کردہ سمری میں پٹرولیم مصنوعات پر عائد لیوی میں کمی کر کے قیمتیں کم کرنے کی سفارش کی گئی تھی۔ سمری میں بتایا گیا تھا کہ پٹرول کی کی قیمت میں فی لیٹر27 روپے سے زائد، مٹی کی فی لیٹر قیمت پر 11 روپے سے زائد جبکہ ڈیزل پر 30 روپے لیوی عائد ہے۔
لیوی کی شرح میں کمی کر کے قیمتیں کم کی جا سکتی ہیں۔ سمری سفارش کی گئی کہ 16 اکتوبر سے پٹرولیم مصنوعات کی قیمتوں میں کمی کی جائے۔ اسی طرح وزارت خزانہ کی جانب سے یکم اکتوبر سے پٹرولیم مصنوعات کی قیمتوں میں معمولی رد و بدل کیا گیا تھا۔ صرف ہائی اسپیڈ ڈیزل کی فی لیٹر قیمت میں کمی کی گئی۔ یکم اکتوبر سے ہائی سپیڈ ڈیزل کی قیمت میں 2 روپے 40 پیسے فی لیٹر کمی کی گئی۔جبکہ پٹرول کی فی لیٹر قیمت 103 روپے97پیسے، مٹی کے تیل کی قیمت 65 روپے 29 پیسے، لائیٹ ڈیزل آئل کی قیمت 62 روپے 86 پیسے فی لیٹر برقرار رکھی گئی۔ جبکہ ہائی اسپیڈ ڈیزل کی نئی قیمت 104 روپے 6 پیسے فی لیٹر مقرر کی گئی۔کورونا میں کمی کے بعد فضائی سفر کیلئے طیاروں میں استعمال ہونیوالے ایندھن جیٹ فیول کی کھپت میں 27 فیصد کا اضافہ دیکھا گیا۔ گزشتہ ماہ مقامی ایوی ایشن انڈسٹری میں جیٹ فیول کی کھپت 38 ہزار 473 ٹن رہی جو کہ اگست کے دوران 30 ہزار 286 ٹن کی سطح پر تھی،گزشتہ ماہ فرنس آئل کی کھپت میں بھی20ف یصد کا اضافہ ہوااور فرنس آئل کی کھپت 3 لاکھ92ہزار ٹن کی سطح پر رہی ، مٹی کے تیل کی کھپت بھی 15فیصد بڑھکر 8417 ٹن رہی ، پٹرول کی کھپت میں کمی دیکھی گئی اور 8فیصد کی کمی سے 6 لاکھ 55 ہزار ٹن پٹرول فروخت ہوا ،ڈیزل کی کھپت 7 فیصد کمی سے 4 لاکھ85ہزار ٹن رہی،گزشہ ماہ ہائی اوکٹین کی کھپت بھی کم رہی اور20فیصد کمی سے ایک لاکھ 11 ہزار ٹن سے زائد ہائی اوکٹین کی فروخت دیکھی گئی ،لائٹ ڈیزل آئل کی کھپت 33فیصد کمی سے 957ٹن رہی ۔
