وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ پی ڈی ایم کے جلسے کی قیادت کالعدم تحریک طالبا پاکستان (ٹی ٹی پی) کے دوست کر رہے ہیں۔
آج سے ٹھیک 13 سال قبل کراچی میں کارساز کے قریب محترمہ بے نظیر بھٹو کے قافلے پر دھماکا کیا گیا تھا جس میں 150 سے زائد افراد جاں بحق اور درجنوں زخمی ہو گئے تھے۔
پیپلز پارٹی آج کراچی کے باغ جناح میں اپوزیشن جماعتوں کے اتحاد پی ڈی ایم کے ساتھ مل کر جلسہ کر رہی ہے جس میں تمام بڑی اپوزیشن جماعتوں کے مرکزی رہنما بھی شرکت کریں گے۔
وفاقی وزیر برائے سائنس اینڈ ٹیکنالوجی فواد چوہدری نے اس حوالے سے سوشل میڈیا پر ایک ٹوئٹ کی ہے۔
فواد چوہدری نے اپنے ٹوئٹ میں لکھا کہ آج سے 13 سال قبل پاکستان کی تاریخ کا سب سے بڑا خود کش حملہ ہوا، بےنظیر بھٹو شہید کے قافلے کو ٹارگٹ کیا گیا، 180 لوگ شہید اور 500 سے زیادہ لوگ ہاتھوں اور پاؤں سے محروم ہو گئے۔
وفاقی وزیر نے مزید لکھا کہ اس دہشت گردی کی ذمہ داری کالعدم تحریک طالبان پاکستان (ٹی ٹی پی) نے قبول کی۔
فواد چوہدری نے کسی کا نام لیے بغیر اپوزیشن کو تنقید کا نشانہ بناتے ہوئے کہا کہ آج اسی جگہ پی ڈی ایم کا جلسہ ہے اور قیادت ٹی ٹی پی کے دوست کر رہے ہیں۔
