وزیراعظم عمران خان نے کہا ہے کہ راوی اربن ڈیویلپمنٹ منصوبہ پنجاب اور پورے پاکستان کے لیے اہم ہے۔
تفصیلات کے مطابق وزیراعظم عمران خان کی زیر صدارت راوی اربن ڈیویلپمنٹ پراجیکٹ پر پیش رفت کے حوالے سے اجلاس ہوا جس میں وزیراعظم کو منصوبے کے حوالے سے پیش رفت پر تفصیلی بریفنگ دی گئی۔
اجلاس کی صدارت کرتے ہوئے وزیراعظم نے ہدایت کی کہ راوی اربن ڈیویلپمنٹ منصوبے کی بر وقت تکمیل ہونی چاہیے اور اس ضمن میں ہر رکاوٹ کو فوری دور کیا جائے۔
عمران خان نے یہ بھی کہا کہ تمام قانونی تقاضے پورے کیے جائیں اور مکمل شفافیت سے کام پورا کیا جائے۔
وزیراعظم عمران خان نے مزید کہا کہ راوی اربن ڈیویلپمنٹ منصوبہ پنجاب اور پورے پاکستان کے لیے اہم ہے، منصوبے کی وجہ سے زر مبادلہ حاصل ہوگا اور روزگار کے مواقع پیدا ہوں گے۔
اجلاس میں شبلی فراز، سید فخر امام، شہزاد اکبر، وزیر اعلی پنجاب سردار عثمان بزدار، وزیر خزانہ پنجاب مخدوم ہاشم جواں بخت، مشیر وزیراعلی ڈاکٹر سلمان شاہ، چیف سیکریٹری پنجاب، سینئیر ممبر بورڈ آف ریوینیو پنجاب، چیرمین نیا پاکستان ہاؤسنگ و ڈیویلپمنٹ اتھارٹی لیفٹیننٹ جنرل (ر) انور علی حیدر، چیرمین راوی اربن ڈیویلپمنٹ اتھارٹی، صدر بینک آف پنجاب، نائب چیرمین لاہور ڈیویلپمنٹ اتھارٹی، کمشنر لاہور اور سینیئر افسران بھی شریک ہوئے۔
