بھارتی مظالم اور غیر قانونی قبضے سے جان چھڑانے کیلئے دنیا بھر میں کشمیری آج حق خود ارادیت کا دن منارہے ہیں۔ یہ دن منانے کا مقصد کشمیریوں کی تحریک آزادی اور خودارادیت کیلئے جدوجہد کی جانب عالمی برادری کی توجہ مرکوز کرانا ہے۔
مقبوضہ کشمیر پر بھارتی قبضے کو دہائیں بیت گئیں ہیں، تاہم کشمیریوں پر ظلم و جبر کا سلسلہ تھمنے کی بجائے اور تیز ہوگیا ہے۔ سینکڑوں شہادتوں، پیلٹ گنوں سے معذوری اور خواتین کی عصمت دری کے واقعات کے باوجود کشمیریوں کا جذبہ آزادی جنون پکڑ رہا ہے۔
کشمیریوں کا بڑا مطالبہ بھارتی تسلط سے آزادی اور حق خودارادیت ہے، جبکہ کشمیریوں سے اظہار یکجہتی اور حق خودارادیت کی منصفانہ جدوجہد میں کشمیری عوام کی حمایت اور اس دیرینہ تنازعے کے حل سے متعلق اقوام متحدہ اور عالمی بر ادری کو وعدے یاد دلانے کےلئے یہ دن ہر سال پانچ جنوری کو یوم حق خودارایت کے نام سے منایا جاتا ہے۔
اس دن کی مناسبت سے سرحد کے آر پار اور دنیا بھر میں موجود کشمیری اپنے حق خود ارادیت کیلئے سیمینار، مذاکروں احتجاج اور ریلیوں کا اہتمام کرتے ہیں،اس حوالے سے آج بھی سیمینار زکا انعقاد ہوگا اور ریلیاں بھی نکالی جائیں گی۔
اس حوالے سے صدر پاکستان عارف علوی نے یوم حق خودارادیت کے موقع پر اپنے پیغام میں کہا ہے کہ حق خودارادیت انسانی احترام کا بنیادی جزو ہے، وقت آگیا ہے کہ عالمی برادری کو بھارتی غیر قانونی قبضے کے خلاف ایکشن اور مقبوضہ جموں وکشمیر کے مظلوم عوام سے کئے گئے وعدوں و یقین دہانیوں اور اس حوالے سے اپنی ذمہ داریوں کو پورا کرنا چاہیے۔
واضح رہے کہ اقوام متحدہ نے پانچ جنوری1949 میں ایک قرارداد منظور کی تھی جس میں جموں و کشمیر کے عوام کے بنیادی انسانی حقوق کو تسلیم کیا گیا تھا اور انہیں آزادانہ اور شفاف استصواب رائے کے ذریعے حق خودارادیت دلانے کا وعدہ کیا گیا تھا۔
